ഭാരതത്തിന്റെ ഭൂപടം തെറ്റായി ചിത്രീകരിച്ചു; മാപ്പ് പറഞ്ഞ് മോട്ടോ ജിപി സംഘാടകർ

നോയിഡ: ഭാരതത്തിന്റെ ഭൂപടം തെറ്റായി ചിത്രീകരിച്ചതിൽ മാപ്പ് പറഞ്ഞ് മോട്ടോ ജിപി സംഘാടകർ. ജമ്മു കശ്മീർ, ലഡാക്ക് എന്നീ കേന്ദ്രഭരണ പ്രദേശങ്ങൾ ഒഴിവാക്കികൊണ്ടാണ് ഭൂപടം പ്രദർശിപ്പിച്ചത്. മോട്ടോ ജിപി ബൈക്ക് പരിശീലന റേസിംഗിന്റെ തത്സമയ പ്രക്ഷേപണത്തിലാണ് ഇത്തരത്തിൽ അബദ്ധമുണ്ടായത്.

‘മോട്ടോജിപി പ്രക്ഷേപണത്തിന്റെ ഭാഗമായി പ്രദർശിപ്പിച്ച ഭൂപടം തെറ്റായിരുന്നു. ഇന്ത്യയിലെ ആരാധകരോട് ക്ഷമ ചോദിക്കുന്നു. ആതിഥേയ രാജ്യത്തെ പിന്തുണയക്കുന്നു. മറ്റൊരു തരത്തിലുമുള്ള ഉദ്ദേശ്യവുമില്ല. മോട്ടോജിപി പ്രസ്താവനയിൽ പറഞ്ഞു.

മോട്ടോജിപിയുടെ തത്സമയ സ്ട്രീം ചെയ്ത പരിശീലന സെഷനുകളിൽ പ്രദർശിപ്പിച്ച ഭൂപടത്തെക്കുറിച്ച് നിരവധി നെറ്റിസൺമാർ ആശങ്ക ഉന്നയിച്ചപ്പോൾ ഓൺലൈനിൽ വിവാദങ്ങൾ ഉയർന്നു. തുടർന്ന് പൊതുജനങ്ങളുടെ ആശങ്കകൾക്ക് മറുപടിയായി സംഘാടകർ ഭൂപടം ശരിയാക്കുകയും വിഷയത്തിൽ വിശദീകരണം നൽകുകയും ചെയ്യുകയായിരുന്നു.