അൽ ഖായിദ നേതാവിന്‍റെ ഭീഷണി കാര്യമാക്കുന്നില്ല; സുരക്ഷാസേന സര്‍വ്വസജ്ജമെന്ന് കേന്ദ്രസര്‍ക്കാര്‍

ദില്ലി : ജമ്മു കശ്മീരില്‍ സംഘര്‍ഷം സൃഷ്ടിക്കാനുള്ള അൽ ഖായിദ നേതാവിന്‍റെ ആഹ്വാനം തള്ളിക്കളഞ്ഞ് ഇന്ത്യന്‍ വിദേശകാര്യ മന്ത്രാലയം. ഇത്തരം ആഹ്വാനങ്ങള്‍ പതിവാണ്, അത് നേരിടാന്‍ ഇന്ത്യയുടെ സുരക്ഷാസേന സര്‍വ്വസജ്ജമാണ്, രാജ്യത്തിന്‍റെ പരമാധികാരവും അഖണ്ഡതയും നിലനിര്‍ത്തുന്നതിനുള്ള കഴിവുണ്ട്. ഇത്തരം ഭീഷണികളെ കാര്യമായി എടുക്കേണ്ടതില്ലെന്നും വിദേശകാര്യ മന്ത്രാലയ വക്താവ് റവീഷ് കുമാര്‍ പറഞ്ഞു. വിദേശകാര്യ മന്ത്രാലയത്തില്‍ നടത്തിയ പ്രതിവാര വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.

അൽ ഖായിദ തലവന്‍ അയ്മന്‍ അല്‍ സവാഹിരിയാണ് കശ്മീരിലെ മുജാഹിദുകള്‍ ഏകമനസ്സോടെ ഇന്ത്യന്‍ സൈന്യത്തിനും സര്‍ക്കാരിനും എതിരായി ദയയില്ലാത്ത ആക്രമണം നടത്താന്‍ വീഡിയോയിലൂടെ ആഹ്വാനം ചെയ്തത്. അതിലൂടെ ഇന്ത്യക്ക് സാമ്പത്തികമായും സൈനികപരമായും കനത്ത ആഘാതമുണ്ടാക്കണമെന്നും പള്ളികളോ മാര്‍ക്കറ്റുകളോ മുസ്ലീങ്ങള്‍ ഒത്തുചേരുന്ന പ്രദേശങ്ങളോ ആക്രമിക്കരുതെന്നും സവാഹിരി പറഞ്ഞിരുന്നു.

ആഗോള മുസ്ലിമുകളുടെ ജിഹാദിന്‍റെ ഭാഗമാണ് കശ്മീരിലെ പോരാട്ടം എന്നുപറഞ്ഞ സവാഹിരി അതിര്‍ത്തിയിലെ ഭീകരവാദം വളര്‍ത്തുന്നതില്‍ പാകിസ്താനുള്ള പങ്കിനെ കുറിച്ചും പരമര്‍ശിച്ചു. തങ്ങളെ രാഷ്ട്രീയ ലക്ഷ്യങ്ങള്‍ക്ക് ഉപയോഗിച്ച ശേഷം മുജാഹിദീനുകളെ വലിച്ചെറിയുകയോ പീഡിപ്പിക്കുകയോ ചെയ്യാനാണ് പാകിസ്താന് താല്‍പര്യമെന്നായിരുന്നു സവാഹിരിയുടെ പരാമര്‍ശം.