കൂടിക്കാഴ്ച വിജയം! ക്രൈസ്തവർക്കെതിരായി നടക്കുന്ന അതിക്രമങ്ങൾ പ്രധാനമന്ത്രിയുടെ ശ്രദ്ധയിൽപെടുത്തിയെന്ന് കർദിനാൾ ആലഞ്ചേരി

ദില്ലി: പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ച വിജയകരമായിരുന്നുവെന്ന് കർദിനാൾ ജോർജ് ആലഞ്ചേരി. ഉത്തരേന്ത്യയിൽ ക്രൈസ്തവർക്കെതിരായി നടക്കുന്ന അതിക്രമങ്ങൾ പ്രധാനമന്ത്രിയുടെ ശ്രദ്ധയിൽപെടുത്തി. എല്ലാ മതസ്ഥർക്കും സംരക്ഷണം ഉറപ്പാക്കുമെന്ന് പ്രധാനമന്ത്രി ഉറപ്പ് നൽകിയെന്നും
ആലഞ്ചേരി അറിയിച്ചു.

കേരളത്തിലെ ജനങ്ങളുടെ ആവശ്യങ്ങൾ പ്രധാനമന്ത്രിയെ അറിയിച്ചു. കേരളത്തിനായി പുതിയ പദ്ധതികൾ കൊണ്ടുവരുന്നതിനെ കുറിച്ച് പ്രധാനമന്ത്രി വിശദീകരിച്ചു. ഭാരതത്തെ ഒന്നായാണ് കാണുന്നതെന്നും വികസന പരിപാടികളിൽ സഹകരിക്കാൻ കേരളവും തയാറാകണമെന്നും പ്രധാനമന്ത്രി അറിയിച്ചതായും എല്ലാ പ്രശ്നങ്ങളേയും അദ്ദേഹം തുറന്ന മനോഭാവത്തോടെയാണ് ശ്രവിച്ചതെന്നും ആലഞ്ചേരി വ്യക്തമാക്കി. പോപ്പിനെ ഇന്ത്യയിലേക്ക് ക്ഷണിച്ചതായി പ്രധാനമന്ത്രി തന്നെ അറിയിച്ചു. കേരളത്തിന്റെ ആവശ്യങ്ങൾ അറിയിക്കാൻ സാധിച്ചതിൽ സഭാധ്യക്ഷൻമാർക്ക് ഏറെ സന്തോഷമാണെന്നും കർദിനാൾ ആലഞ്ചേരി കൂട്ടിച്ചേർത്തു.