രാഷ്ട്രനിർമ്മാണത്തിൽ സൈനിക സ്കൂളുകൾ നിർണ്ണായകം; അഖിലേന്ത്യാ പ്രിൻസിപ്പൽമാരുടെ സമ്മേളനത്തിന് കഴക്കൂട്ടം വേദിയായി

തിരുവനന്തപുരം: അച്ചടക്കവും ദേശസ്നേഹവുമുള്ള യുവതലമുറയെ വാർത്തെടുക്കുന്നതിൽ സൈനിക സ്കൂളുകളുടെ പങ്ക് സമാനതകളില്ലാത്തതാണെന്ന് കേന്ദ്ര പ്രതിരോധ സഹമന്ത്രി സഞ്ജയ് സേട്ട്. കഴക്കൂട്ടം സൈനിക സ്കൂളിൽ ആരംഭിച്ച 52-ാമത് അഖിലേന്ത്യാ സൈനിക സ്കൂൾ പ്രിൻസിപ്പൽമാരുടെ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. രാജ്യത്തെ 33 സൈനിക സ്കൂളുകളിലെ പ്രതിനിധികളും പുതുതായി ആരംഭിച്ച 79 സ്കൂളുകളിലെ പ്രിൻസിപ്പൽമാരും രണ്ട് ദിവസത്തെ ഈ സമ്മേളനത്തിൽ പങ്കുചേരുന്നുണ്ട്.

സമ്മേളനത്തിന്റെ ഭാഗമായി വിവിധ മേഖലകളിൽ മികവ് തെളിയിച്ച സ്കൂളുകൾക്ക് മന്ത്രി പുരസ്കാരങ്ങൾ വിതരണം ചെയ്തു. നാഷണൽ ഡിഫൻസ് അക്കാദമി (NDA), ഇന്ത്യൻ നേവൽ അക്കാദമി (INA) എന്നിവിടങ്ങളിലേക്ക് ഏറ്റവും കൂടുതൽ വിദ്യാർത്ഥികളെ അയച്ചതിന് ജമ്മുവിലെ നഗ്രോട്ട സൈനിക സ്കൂൾ 2025-ലെ രക്ഷാമന്ത്രി ട്രോഫി കരസ്ഥമാക്കി. പത്താം ക്ലാസ് സിബിഎസ്ഇ പരീക്ഷയിൽ മികച്ച വിജയം നേടിയ സത്താര സൈനിക സ്കൂളിനെയും, പന്ത്രണ്ടാം ക്ലാസ് പരീക്ഷയിൽ തിളക്കമാർന്ന വിജയം കൈവരിച്ച ആതിഥേയരായ കഴക്കൂട്ടം സൈനിക സ്കൂളിനെയും മെറിറ്റ് സർട്ടിഫിക്കറ്റുകൾ നൽകി മന്ത്രി അഭിനന്ദിച്ചു.

രാജ്യത്തുടനീളം 100 പുതിയ സൈനിക സ്കൂളുകൾ സ്ഥാപിക്കാനുള്ള പ്രധാനമന്ത്രി നരേന്ദ്ര മോദിയുടെ കാഴ്ചപ്പാട് ഗുണനിലവാരമുള്ള വിദ്യാഭ്യാസം ഉറപ്പാക്കുന്നതിനുള്ള സർക്കാരിന്റെ പ്രതിബദ്ധതയെയാണ് കാണിക്കുന്നതെന്ന് സഞ്ജയ് സേട്ട് പറഞ്ഞു. ദേശീയ വിദ്യാഭ്യാസ നയം 2020-ന് അനുസൃതമായി പൊതു-സ്വകാര്യ പങ്കാളിത്തത്തോടെയാണ് (PPP Model) ഈ പദ്ധതി നടപ്പിലാക്കുന്നത്. നിലവിൽ 86 സ്കൂളുകൾക്ക് അംഗീകാരം നൽകുകയും ഇതിൽ 79 എണ്ണം പ്രവർത്തനം ആരംഭിക്കുകയും ചെയ്തിട്ടുണ്ട്. പഴയ സൈനിക സ്കൂളുകളുടെ അതേ നിലവാരവും അച്ചടക്കവും പുതിയ സ്കൂളുകളിലും ഉറപ്പാക്കുമെന്നും അദ്ദേഹം കൂട്ടിച്ചേർത്തു.

യുദ്ധസ്മാരകത്തിൽ പുഷ്പാർച്ചന നടത്തിയ ശേഷമാണ് സമ്മേളന നടപടികൾ ആരംഭിച്ചത്. സൈനിക സ്കൂൾ സംവിധാനം ശക്തിപ്പെടുത്തുന്നതിനുള്ള നയപരമായ തീരുമാനങ്ങൾ, അക്കാദമിക് അവലോകനം, ഭാവി സംരംഭങ്ങൾ എന്നിവ സമ്മേളനത്തിൽ ചർച്ചയായി. കൂടാതെ, നൂതന വിദ്യാഭ്യാസ സാങ്കേതികവിദ്യകൾ പരിചയപ്പെടുത്തുന്ന ‘ഗ്യാൻ മേള’ എന്ന വിദ്യാഭ്യാസ പ്രദർശനവും സമ്മേളനത്തിന്റെ ഭാഗമായി ഒരുക്കിയിരുന്നു. പ്രതിരോധ മന്ത്രാലയത്തിലെ ജോയിന്റ് സെക്രട്ടറി സത്യജിത് മൊഹന്തി ഉൾപ്പെടെയുള്ള ഉന്നത ഉദ്യോഗസ്ഥരും പ്രിൻസിപ്പൽമാരും ചടങ്ങിൽ സംബന്ധിച്ചു. സമ്മേളനം നാളെ സമാപിക്കും.