ഝാര്‍ഖണ്ഡിൽ ഖനിയപകടം; നാല് മരണം!! നിരവധിയാളുകൾ കുടുങ്ങിക്കിടക്കുന്നു; ദുരന്തത്തിനിരയായത് പ്രവർത്തനം നിര്‍ത്തിവെച്ചിരുന്ന കല്‍ക്കരി ഖനിയിൽ അനധികൃതമായി ഖനനം നടത്താനെത്തിയവർ

റാഞ്ചി: ഝാര്‍ഖണ്ഡിലുണ്ടായ ഖനിയപകടത്തില്‍ നാല് മരണം. ആറ് പേര്‍ക്ക് പരിക്കേറ്റു. പ്രവർത്തനം നിര്‍ത്തിവെച്ചിരുന്ന കല്‍ക്കരി ഖനിയിൽ അനധികൃതമായി ഖനനം നടത്താനെത്തിയവരാണ് അപകടത്തിനിരയായതെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്തു. ഏതാനും പേർ ഖനിയിൽ കുടുങ്ങിക്കിടക്കുന്നുണ്ടെന്നാണ് വിവരം. ഖനിയുടെ ഒരുഭാഗം തകര്‍ന്നു വീഴ്ന്നാണ് അപകടമുണ്ടായത്.

രാംഗഡ് ജില്ലയില്‍ ശനിയാഴ്ച രാവിലെയാണ് സംഭവം. സംഭവസ്ഥലത്തുനിന്ന് നാല് മൃതദേഹം കണ്ടെത്തിയതായി രാംഗഡ് എസ്ഡിപിഒ പരമേശ്വര്‍ പ്രസാദ് പറഞ്ഞു.
പോലീസ് എത്തുന്നതിന് മുന്‍പ് തന്നെ പ്രദേശവാസികള്‍ മൂന്ന് പേരുടെ മൃതശരീരം വീണ്ടെടുത്തിരുന്നു. രക്ഷാപ്രവര്‍ത്തനം പുരോഗമിക്കുകയാണ്. സെന്‍ട്രല്‍ കോള്‍ഫീല്‍ഡ്‌സ് ലിമിറ്റഡിന്റെ ഉടമസ്ഥതയിലുള്ള ഖനിയാണിത്. കൂടുതല്‍ പേര്‍ കുടുങ്ങിക്കിടക്കുന്നുണ്ടെന്ന് സംശയിക്കുന്നതായി പോലീസ് അധികൃതർ അറിയിച്ചു.