വൺവേ തെറ്റിച്ച് ചീറിപ്പാഞ്ഞ് മന്ത്രി മുഹമ്മദ് റിയാസിന്റെ വാഹനം; വളയം ഭാഗത്ത് ഗതാഗതക്കുരുക്കിൽ ശ്വാസം മുട്ടി ജനങ്ങൾ

കോഴിക്കോട് : വൺവേ തെറ്റിച്ചെത്തിയ മന്ത്രിയുടെ വാഹനം കാരണം ഗതാഗതക്കുരുക്കിൽ ശ്വാസം മുട്ടി ജനങ്ങൾ. ഇന്ന് വൈകുന്നരം നാലര മണിയോടെ കല്ലാച്ചി പഴയ മാർക്കറ്റ് റോഡിലാണ് മന്ത്രി പി.എ.മുഹമ്മദ് റിയാസിന്റെ വാഹനമാണ് വൺവേ തെറ്റിച്ച് കുതിച്ചു പാഞ്ഞെത്തിയത്.

വളയം ഭാഗത്തുനിന്നാണ് മുഹമ്മദ് റിയാസിന്റെ വാഹനം ട്രാഫിക് സംവിധാനം തെറ്റിച്ച് ചീറിപ്പാഞ്ഞെത്തിയത്. വളയത്ത് സ്വകാര്യ ആശുപത്രിയുടെ ഉദ്ഘാടനം കഴിഞ്ഞ് മടങ്ങുകയായിരുന്നു മന്ത്രി. വളയം ഭാഗത്ത് നിന്ന് കുറ്റ്യാടി ഭാഗത്തേക്ക് പൊലീസ് അകമ്പടി ഇല്ലാതെയായിരുന്നു മന്ത്രിയുടെ വരവ്. രണ്ടു വാഹനങ്ങൾക്ക് കഷ്ടിച്ച് കടന്നുപോകാൻ കഴിയുന്ന റോഡിൽ എതിരെ വന്ന വാഹനങ്ങൾക്ക് മുന്നോട്ടു പോകാനാകാതെ വന്നതോടെ സ്ഥലത്ത് ഗതാഗതം തടസപ്പെട്ടു.

രണ്ടു വാഹനങ്ങൾക്ക് കഷ്ടിച്ച് കടന്നുപോകാൻ കഴിയുന്ന റോഡിൽ, എതിരെ ബസ് എത്തിയതോടെ മന്ത്രിയുടെ വാഹനം കുടുങ്ങി. ഒടുവിൽ നാട്ടുകാരുടെ ഇടപെടലാണ് മന്ത്രിയുടെ വാഹനത്തിന് മുന്നോട്ടു പോകാൻ സൗകര്യമൊരുക്കിയത്.