ഇതും കേരളത്തിലെ ഒറ്റപ്പെട്ട സംഭവമോ? ചാന്ദ്‌നിയുടെ കൊലപാതകം അതി ദാരുണമെന്ന് മന്ത്രി പി രാജീവ്, പോലീസിന് വീഴ്ച പറ്റിയിട്ടില്ലെന്ന് ന്യായീകരണം

ആലുവ: അഞ്ച് വയസ്സുകാരി ചാന്ദ്‌നിയുടെ കൊലപാതകം അതിദാരുണമെന്ന് മന്ത്രി പി രാജീവ്. പ്രതിയെ വേഗത്തിൽ പിടികൂടിയെന്നും കുട്ടിയെ തിരിച്ചുകിട്ടുമെന്ന് പ്രതീക്ഷിച്ചിരുന്നുവെന്നും, സംഭാവത്തിൽ പോലീസിന് വീഴ്ച പറ്റിയിട്ടില്ലെന്നുമാണ് മന്ത്രി ന്യായീകരിച്ചത്. വളരെ വേദനിപ്പിക്കുന്ന സംഭവമെന്നായിരുന്നു ആരോഗ്യമന്ത്രി വീണ ജോർജിന്റെ പ്രതികരണം. കുറ്റകൃത്യത്തിനെതിരെ ശക്തമായ നടപടിയുണ്ടാകുമെന്നും മന്ത്രി പറഞ്ഞു. എന്നാലിതുംകേരളത്തിലെ ഒരു ഒറ്റപ്പെട്ട സംഭവമാണോ എന്നാണ് സമൂഹ മാദ്ധ്യമങ്ങൾ ഒന്നടങ്കം ചോദിക്കുന്നത്.

പ്രതിക്ക് മറ്റാരുടെയെങ്കിലും സഹായം ലഭിച്ചിട്ടുണ്ടോയെന്ന് പരിശോധിക്കുകയാണെന്ന് ഡിഐജി ശ്രീനിവാസ് പറഞ്ഞു. ഇൻക്വസ്റ്റ് നടപടികൾ പൂർത്തിയായതായും പെൺകുട്ടി അതിക്രൂര പീഡനത്തിനിരയായെന്നും ശ്രീനിവാസ് വ്യക്തമാക്കി. പീഡനത്തിന് ശേഷം പെൺകുട്ടിയെ കഴുത്ത് ഞെരിച്ചാണ് പ്രതി കൊലപ്പെടുത്തിയത്.കുട്ടിയുടെ മുഖത്ത് കല്ലുകൊണ്ട് ഇടിച്ച പാടുകളും കഴുത്തില്‍ കറുത്ത ചരടിട്ട് മുറുക്കിയ പാടുകളും കാണപ്പെട്ടിട്ടുണ്ട്. രഹസ്യ ഭാഗങ്ങളില്‍ അടക്കം കുട്ടിയുടെ ശരീരം ആസകലം മുറിവുകളുണ്ട്. മൃതദേഹം ഇന്നുതന്നെ ബന്ധുക്കള്‍ക്ക് വിട്ടുനല്‍കും. നാളെ സംസ്‌കാരം നടത്താനാണ് തീരുമാനം.