തീപ്പെട്ടിയുണ്ടോ ? ചേട്ടാ ..വര്‍ക്ഷോപ്പാണെന്ന് തെറ്റിദ്ധരിച്ച്‌ കഞ്ചാവ് ബീഡി വലിക്കാൻ തീപ്പെട്ടി തേടി ചെന്ന് കേറിയത് എക്‌സൈസ് ഓഫീസിൽ !! വിദ്യാർത്ഥികൾ പിടിയിൽ

കഞ്ചാവ് ബീഡി കത്തിക്കാന്‍ തീപ്പെട്ടി ചോദിച്ച് എക്‌സൈസ് ഓഫീസിലെത്തിയ വിദ്യാർത്ഥികൾ പിടിയില്‍. മൂന്നാറിലേക്ക് വിനോദയാത്ര വന്ന പ്രായപൂര്‍ത്തിയാകാത്ത വിദ്യാർത്ഥികളാണ് അദ്ധ്യാപകരുടെയും സഹപാഠികളുടെയും കണ്ണ് വെട്ടിച്ച് കഞ്ചാവ് ബീഡി വലിക്കാൻ തീപ്പെട്ടി തപ്പി ഇറങ്ങിയത്. തിങ്കളാഴ്ച രാവിലെ പതിനൊന്ന് മണിയോടെയാണ് സംഭവം നടക്കുന്നത്. അടിമാലിയില്‍ ഭക്ഷണം കഴിക്കാനായി വാഹനം നിര്‍ത്തിയപ്പോള്‍ ഇവര്‍ പുകവലിക്കാനായി ഒഴിഞ്ഞസ്ഥലം തേടി പോകുകയായിരുന്നു.

ലഹരിക്കടത്തുമായി ബന്ധപ്പെട്ട് വാഹനങ്ങള്‍ പിടിച്ചിട്ടതിനാല്‍ ഇത് വര്‍ക്ഷോപ്പാണെന്നാണ് വിദ്യാർത്ഥികൾ തെറ്റിദ്ധരിച്ചത്. പിന്‍വശത്തുകൂടി കെട്ടിടത്തിനകത്ത് കയറി തീപ്പെട്ടിയുണ്ടോയെന്ന് ചോദിച്ചു.എന്നാല്‍ യൂണിഫോമിലുള്ള ഉദ്യോഗസ്ഥരെ കണ്ടതോടെ രണ്ടുകുട്ടികള്‍ ഇറങ്ങിയോടി. സംശയം തോന്നിയ എക്‌സൈസ് ഉദ്യോഗസ്ഥര്‍ കുട്ടികളെ തടഞ്ഞുവെച്ച് ചോദ്യംചെയ്തു. പരിശോധനയില്‍ അഞ്ച് ഗ്രാമോളം കഞ്ചാവും ഹാഷിഷ് ഓയിലും ഇവരിൽ നിന്ന് കണ്ടെത്തി. ശേഷം അദ്ധ്യാപകരെ വിളിച്ചുവരുത്തുകയും രക്ഷിതാക്കളെ അറിയിക്കുകയും ചെയ്തു. രക്ഷിതാക്കള്‍ എത്തിയതിന് ശേഷം വിദ്യാർത്ഥികൾക്ക് കൗണ്‍സിലിങ് നല്‍കുകയും വിട്ടയക്കുകയുമായിരുന്നു. കുട്ടികള്‍ക്കെതിരേ കേസെടുത്ത് ജുവനൈല്‍ ജസ്റ്റിസ് ബോര്‍ഡിന് കൈമാറിയിട്ടുണ്ട്.