എം ആര്‍ അജിത് കുമാറിന് രാഷ്ട്രപതിയുടെ വിശിഷ്ട സേവനത്തിന് വീണ്ടും ശുപാര്‍ശ; കേന്ദ്രത്തിന് മുന്നിൽ ശുപാർശ എത്തുന്നത് ഇത് ആറാം തവണ

തിരുവനന്തപുരം: എഡിജിപി എം.ആർ അജിത് കുമാറിന് രാഷ്ട്രപതിയുടെ വിശിഷ്ട സേവാ മെഡലിന് വീണ്ടും ശുപാർശ. ഡിജിപി സംസ്ഥാന സർക്കാരിന് നൽകിയ ശുപാർശ കേന്ദ്രത്തിന് ഉടൻ കൈമാറും. ആഗസ്റ്റിൽ പ്രഖ്യാപനം നടത്തി ജനുവരി 26ന് മെഡൽ നൽകുകയാണ് പതിവ്. എഡിജിപി റാങ്കിലെത്തിയത് മുതൽ എം.ആ‍ർ.അജിത് കുമാറിന്‍റെ പേര് അഞ്ചു തവണയാണ് കേന്ദ്രത്തിന് മുന്നിൽ എത്തിയത്. എന്നാൽ ഐബി റിപ്പോർട്ട് എതിരായതിനാൽ അഞ്ച് തവണയും കേന്ദ്രം ശുപാർശ തള്ളി.

ജൂനിയറായ എഡിജിപിമാർക്ക് വിശിഷ്ട സേവനം ലഭിച്ചപ്പോഴും അജിത് കുമാറിനെ കേന്ദ്ര തഴഞ്ഞതിൽ അദ്ദേഹത്തിന് അമർഷമുണ്ടായിരുന്നു. രണ്ടു വർഷം മുമ്പ് ഡിജിപിയായിരുന്ന അനിൽകാന്തിന്‍റെ റിപ്പോർട്ട് എം.ആർ. അജിത്കുമാറിനെതിരായതാണ് അവസാന നിമിഷം മെഡൽ നഷ്ടമാകാൻ കാരണം. വിജിലൻസിലിരുന്നപ്പോള്‍ സ്വർണ കടത്ത് കേസിലെ പ്രതി സ്വപ്ന സുരേഷിനെ സ്വാധീനിച്ചുവെന്ന ആരോപണം നേരിടുന്ന കാര്യം ഡിജിപി കേന്ദ്രത്തെ അറിയിച്ചതാണ് മെഡൽ നഷ്ടമാകാൻ കാരണം.