നീലക്കിളി’ അപ്രത്യക്ഷയാകുമോ ? മസ്ക് , ട്വിറ്റർ റീബ്രാൻഡിങ്ങിനൊരുങ്ങുന്നുവെന്ന് റിപ്പോർട്ട്

വാഷിങ്ടൻ : പ്രമുഖ സമൂഹ മാദ്ധ്യമ പാറ്റ്‌ഫോമായ ട്വിറ്റർ റീബ്രാൻഡ് ചെയ്യാൻ ഉടമ ഇലോൺ മസ്ക് പദ്ധതിയിടുന്നതായി റിപ്പോർട്ട്. “ഉടൻ തന്നെ ഞങ്ങൾ ട്വിറ്റർ ബ്രാൻഡിനോടു വിടപറയും, ക്രമേണ എല്ലാ പക്ഷികളോടും.’’– മസ്കിന്റെ ഈ ട്വീറ്റ് പുറത്തുവന്നതോടെയാണ് ഇത് സംബന്ധിച്ച അഭ്യൂഹങ്ങൾ പ്രചരിക്കുവാൻ ആരംഭിച്ചത് . പിന്നാലെ ഞായറാഴ്ച രാത്രി മികച്ച ‘എക്സ്’ ലോഗോ ലഭിച്ചാൽ ലോകമെമ്പാടും അതു നിലവിൽ വരുമെന്ന് മറ്റൊരു ട്വീറ്റ് കൂടി മസ്കിന്റെ ഭാഗത്ത് നിന്നുണ്ടായി.

ചൈനയിൽ വൻ പ്രചാരമുള്ള വീചാറ്റ് പോലെ ഒരു ആപ് നിർമിക്കാനുള്ള മസ്കിന്റെ ശ്രമത്തിന്റെ ഭാഗമാണ് റീബ്രാൻഡിങ് എന്നാണ് ലഭിക്കുന്ന വിവരം. നേരത്തെ ഇക്കഴിഞ്ഞ ഏപ്രിലിൽ ട്വിറ്ററിന്റെ വെബ് പതിപ്പിൽ നീലക്കിളിയെ മാറ്റി പകരം ട്രോൾ ചിത്രമായ ‘ഡോജ്’ നായയെ കുറച്ചുദിവസത്തേയ്ക്കു ലോഗോ ആക്കിയിരുന്നു. ഇതോടെ ക്രിപ്റ്റോ കറൻസിയായ ഡോജ്കോയിന്റെ വില കുതിച്ചുയർന്നിരുന്നു. 30 ശതമാനത്തിലധികമാണ് വില ഉയർന്നത്.

ഈയിടെയായി ‘എക്സ്’ എന്ന പേര് പലപ്പോഴായി മസ്ക് ഉപയോഗിക്കുകയാണ്. പുതിയ സിഇഒ ലിൻഡ യാക്കറിനോയെ സ്വാഗതം ചെയ്യുമ്പോൾ, ‘‘ഈ പ്ലാറ്റ്‌ഫോമിനെ എക്‌സ് ആപ്പാക്കി മാറ്റുന്നതിന് ലിൻഡയ്‌ക്കൊപ്പം പ്രവർത്തിക്കാൻ കാത്തിരിക്കുന്നു’’ എന്നാണ് അദ്ദേഹം പറഞ്ഞത്. ഒക്ടോബറിൽ, ‘‘ട്വിറ്റർ വാങ്ങുന്നത് എല്ലാത്തിനുമുള്ള ആപ്പായ ‘എക്‌സ്’ നിർമിക്കുന്നതിന്റെ ഭാഗമാണ്’’ എന്നും പറഞ്ഞിരുന്നു. അതേസമയം നിരവധി സാങ്കേതിക പ്രശ്നങ്ങളാണ് ട്വിറ്റർ തുടർച്ചയായി നേരിടുന്നത്. കമ്പനിയുടെ പരസ്യ വരുമാനം വൻതോതിൽ കുറയുന്നതും മസ്കിന് തലവേദന സൃഷ്ടിക്കുകയാണ്