നഗരൂർ വാഹനാപകടം; മദ്യപിച്ച് വാഹനമോടിച്ച പ്രതികൾ തകർത്തത് ഒരു കുടുംബത്തെ ഒന്നാകെ; രണ്ടാമത്തെ മകന്റെ മൃതദേഹം കണ്ടെത്തിയത് തലവേർപെട്ട നിലയിൽ, 15 കാരൻ ഗുരുതരാവസ്ഥയിൽ

തിരുവനന്തപുരം: തിരുവനന്തപുരം നഗരൂരിൽ വാഹനാപകടത്തിൽ അച്ഛനും മകനും ദാരുണമായി കൊല്ലപ്പെട്ട സംഭവത്തിൽ രണ്ട് പേർ അറസ്റ്റിൽ. തിരുവനന്തപുരം പള്ളിക്കൽ മടവൂർ സ്വദേശികളായ ഷിറാസ് (30), ജാഫർഖാൻ(42) എന്നിവരാണ് അറസ്റ്റിലായത്. ഇരുവരും വാഹനമോടിച്ചിരുന്ന സമയം  മദ്യലഹരിയിലായിരുന്നെന്നാണ് പോലീസ് പറയുന്നത്. പ്രതികൾ രണ്ടുപേരും വ്യാപാരികളാണ്. അമിത വേഗതയിലെത്തിയ ആഢംബര വാഹനം ഓടിച്ചത് ഷിറാസായിരുന്നു. പ്രതികളുടെ രക്തപരിശോധന നടത്തിയതിൽ നിന്നുമാണ് ഡ്രൈവർ മദ്യപിച്ചതായി കണ്ടെത്തിയെന്ന് പോലീസ് അറിയിച്ചു.

ഇന്നലെ രാത്രി 8.15 ഓടെയാണ് സംഭവം നടന്നത്. അമിതവേഗത്തിലെത്തിയ കാർ, അച്ഛനും 2 മക്കളും സഞ്ചരിച്ചിരുന്ന ബൈക്കിൽ ഇടിച്ച് അപകടമുണ്ടാവുകയായിരുന്നു. കല്ലിങ്കൽ കരിക്കകത്ത് വീട്ടിൽ പ്രദീപ് എന്ന് വിളിക്കുന്ന സുനിൽ കുമാർ, അഞ്ച് വയസ്സുള്ള മകൻ ശ്രീദേവ് എന്നിവരാണ് മരിച്ചത്. പ്രദീപിന്റെ മൂത്ത മകൻ ശ്രീഹരി(15) ഗുരുതര പരിക്കുകളോടെ ആശുപത്രിയിൽ ചികിത്സയിലാണ്. മക്കളോടൊപ്പം യാത്രയിലായിരുന്ന പ്രദീപ് കാറിന്റെ വേഗത ശ്രദ്ധയിൽപ്പെട്ടതിനെ തുടർന്ന് തന്റെ ബൈക്ക് റോഡ് സൈഡിലേക്ക് ഒതുക്കിയിരുന്നു. എന്നാൽ നിയന്ത്രണം വിട്ട കാർ ബൈക്കിലേക്ക് ഇടിച്ചുകയറ്റുകയായിരുന്നുവെന്നാണ് വിവരം.

പ്രദീപിനെയും പരിക്കേറ്റ മൂത്ത മകനെയും ആശുപത്രിയിലേക്ക് മാറ്റി 15 മിനുട്ടിന് ശേഷമാണ് രണ്ടാമത്തെ മകൻ ശ്രീദേവിൻറെ മൃതദേഹം അപകടം നടന്ന റോഡിന്റെ അടുത്തായുള്ള തോട്ടിൽ നിന്ന് കണ്ടെത്തിയത്. സമീപത്തെ തോട്ടിലേക്ക് വീണ ശ്രീദേവിന്റെ തല കമ്പിവേലിയിൽ തട്ടി അറ്റുപോയ നിലയിലായിരുന്നു മൃതദേഹം. നാട്ടുകാർ ചേർന്ന് നടത്തിയ തിരച്ചിലിനൊടുവിലാണ് കുട്ടിയുടെ തല കണ്ടെത്തിയത്. നഗരൂർ കടയിൽ നിന്നും സാധനങ്ങൾ വാങ്ങി വീട്ടിലേക്ക് മടങ്ങി വരികയായിരുന്നു പ്രദീപും മക്കളും. ആശുപത്രിയിലേക്ക് എത്തിക്കാനുള്ള ശ്രമത്തിനിടെയാണ് പ്രദീപ് മരിച്ചത്. ആശുപത്രിയിൽ ചികിത്സയിലുള്ള മൂത്ത മകൻ ശ്രീഹരിയുടെ നില ഗുരുതരമായി തുടരുകയാണെന്ന് ആശുപത്രി അധികൃതർ അറിയിച്ചു.