‘വെള്ളക്കാർ ഇന്ത്യ വിടുക’ എന്ന ആ ചരിത്രവിളി; ഒരു മുദ്രാവാക്യം… ഒരു ജനതയുടെ അചഞ്ചലമായ തീരുമാനം… ഒടുവിൽ ബ്രിട്ടീഷ് ഭരണത്തിന്റെ അടിത്തറ തന്നെ ഇളക്കിയ പ്രസ്ഥാനം! ക്വിറ്റ് ഇന്ത്യാ സമരസേനാനികളെ ഓർത്ത് പ്രധാനമന്ത്രി മോദി

ന്യൂദില്ലി: “ക്വിറ്റ് ഇന്ത്യ” എന്ന ചരിത്രവിളി മുഴങ്ങിയിട്ട് പതിറ്റാണ്ടുകൾ പിന്നിട്ടെങ്കിലും, സ്വാതന്ത്ര്യത്തിനായി പോരാടിയ ആ ധീരരുടെ ത്യാഗം ഇന്നും ഇന്ത്യയുടെ ചരിത്രത്തിൽ ജ്വലിച്ചുനിൽക്കുകയാണ്. ഓഗസ്റ്റ് വിപ്ലവത്തിന്റെ ഓർമ്മ പുതുക്കി, ക്വിറ്റ് ഇന്ത്യാ പ്രസ്ഥാനത്തിലും കകോരി ട്രെയിൻ ആക്ഷനിലും പങ്കെടുത്ത ധീരസമര സേനാനികൾക്ക് ശ്രദ്ധാഞ്ജലി അർപ്പിച്ച് പ്രധാനമന്ത്രി നരേന്ദ്ര മോദി.

ക്വിറ്റ് ഇന്ത്യാ പ്രസ്ഥാനത്തിൽ പങ്കെടുത്ത ഓരോരുത്തരെയും ഓർക്കുന്നതായി പ്രധാനമന്ത്രി എക്‌സിൽ കുറിച്ചു. മഹാത്മാഗാന്ധിയുടെ നേതൃത്വത്തിൽ ഉയർന്ന ഈ പ്രസ്ഥാനം ഇന്ത്യയുടെ സ്വാതന്ത്ര്യസമരത്തിന് പുതിയ ഊർജം പകർന്നുവെന്നും കൊളോണിയൽ ഭരണത്തിൽ നിന്ന് മോചനം നേടാനുള്ള ഇന്ത്യൻ ജനതയുടെ അചഞ്ചലമായ ദൃഢനിശ്ചയത്തിന്റെ പ്രതിഫലനമായിരുന്നുവെന്നും അദ്ദേഹം ചൂണ്ടിക്കാട്ടി. സ്വാതന്ത്ര്യത്തിനായി എല്ലാം ത്യജിച്ച സമരസേനാനികളുടെ ധൈര്യവും ത്യാഗവും ഓരോ ഇന്ത്യക്കാരനും എന്നും പ്രചോദനമായിരിക്കുമെന്നും പ്രധാനമന്ത്രി പറഞ്ഞു.

ക്വിറ്റ് ഇന്ത്യാ പ്രസ്ഥാനത്തെ ഇന്ത്യൻ സ്വാതന്ത്ര്യസമരത്തിലെ നിർണായക അധ്യായമെന്ന് കേന്ദ്ര ആഭ്യന്തര മന്ത്രി അമിത് ഷാ വിശേഷിപ്പിച്ചു. ജനങ്ങളെ ഒരുമിപ്പിക്കുകയും സ്വാതന്ത്ര്യത്തിനായി പോരാടാനുള്ള ധൈര്യം വളർത്തുകയും ചെയ്ത പ്രസ്ഥാനമായിരുന്നു അതെന്ന് അദ്ദേഹം പറഞ്ഞു. രാജ്യത്തിന്റെ വിമോചനത്തിനായി ജീവിതം സമർപ്പിച്ച പോരാളികൾക്ക് ആദരാഞ്ജലി അർപ്പിച്ച അമിത് ഷാ, **രാജ്യ താൽപര്യത്തിന് പ്രഥമ പരിഗണന നൽകാനും, സ്വദേശിയെ സ്വീകരിക്കാനും, സ്വാശ്രയത്വം ശക്തിപ്പെടുത്താനും, വികസിത ഭാരതം എന്ന ലക്ഷ്യത്തിനായി പ്രവർത്തിക്കാനും ഓഗസ്റ്റ് വിപ്ലവത്തിന്റെ ഓർമ്മകൾ പൗരന്മാരെ പ്രചോദിപ്പിക്കണമെന്നും വ്യക്തമാക്കി.

ഇന്ത്യൻ ചരിത്രത്തിലെ അനശ്വര അധ്യായമാണ് ക്വിറ്റ് ഇന്ത്യാ പ്രസ്ഥാനമെന്ന് പ്രതിരോധ മന്ത്രി രാജ്‌നാഥ് സിംഗും പറഞ്ഞു. രാജ്യത്തിന്റെ കൂട്ടായ ശക്തിയും ദൃഢനിശ്ചയവും സ്വാതന്ത്ര്യത്തിലുള്ള അചഞ്ചലമായ വിശ്വാസവുമാണ് ഈ പ്രസ്ഥാനം പ്രതിഫലിപ്പിച്ചതെന്ന് അദ്ദേഹം വ്യക്തമാക്കി. മഹാത്മാഗാന്ധിയെയും സ്വാതന്ത്ര്യത്തിനായി സ്വയം സമർപ്പിച്ച പോരാളികളെയും രക്തസാക്ഷികളെയും അനുസ്മരിച്ച രാജ്‌നാഥ് സിംഗ്, അവരുടെ ത്യാഗത്തിലൂടെയും സമർപ്പണത്തിലൂടെയും പോരാട്ടത്തിലൂടെയുമാണ് ഇന്ത്യ സ്വാതന്ത്ര്യം നേടിയതെന്ന് ചൂണ്ടിക്കാട്ടി.

ശക്തവും സമൃദ്ധവും സ്വാശ്രയവും വികസിതവുമായ ഇന്ത്യ കെട്ടിപ്പടുക്കുന്നതിനായി പ്രവർത്തിക്കുന്നതാണ് സ്വാതന്ത്ര്യസമര സേനാനികൾക്ക് നൽകാവുന്ന യഥാർഥ ആദരാഞ്ജലിയെന്നും രാജ്‌നാഥ് സിംഗ് പറഞ്ഞു. ചരിത്രം ഓർമിക്കപ്പെടുമ്പോൾ, അത് വെറും ഭൂതകാലത്തിന്റെ ഓർമയല്ല; രാജ്യത്തിന്റെ ഭാവിയിലേക്കുള്ള ഉത്തരവാദിത്തത്തിന്റെ ഓർമ്മപ്പെടുത്തൽ കൂടിയാണ്