മലബാർ കലാപത്തെയും വാരിയംകുന്നനെയും വെള്ളപൂശുന്ന നെഹ്‌റു യുവ കേന്ദ്ര സംസ്ഥാന ഡെപ്യൂട്ടി ഡയറക്ടർക്കെതിരെ പ്രതിഷേധം ശക്തം; അലി സാബ്രിനെതിരെ കേന്ദ്രമന്ത്രിയ്‌ക്ക് പരാതി

തിരുവനന്തപുരം: മലബാർ കലാപത്തെയും വാരിയൻകുന്നനെയും വെള്ളപൂശുന്ന രീതിയിൽ ഔദ്യോഗിക ഗ്രൂപ്പുകളിൽ നിർദ്ദേശം നൽകിയ നെഹ്റു യുവ കേന്ദ്ര സംസ്ഥാന ഡെപ്യൂട്ടി ഡയറക്ടർ അലി സാബ്രിനെതിരെ കേന്ദ്രമന്ത്രിയ്‌ക്ക് പരാതി.

തിരുവനന്തപുരം ജില്ലയിലെ നെഹ്രു യുവ കേന്ദ്ര വളണ്ടിയർമാർക്കായി ആരംഭിച്ച ഔദ്യോഗിക വാട്‌സ്ആപ്പ് ഗ്രൂപ്പിൽ വാരിയൻകുന്നനെ പ്രകീർത്തിക്കുന്ന രീതിയിലുള്ള ചില യൂട്യൂബ് ലിങ്കുകളും സന്ദേശങ്ങളും പങ്കുവെച്ചതായും, അലി സാബ്രിൻ തന്റെ പദവി ദുരുപയോഗം ചെയ്യുകയും മതഭ്രാന്തുകളെ മഹത്വവൽക്കരിക്കുകയും, അനേകരുടെ ദേശസ്നേഹം വ്രണപ്പെടുത്തുകയും ചെയ്തതായും യുവജനകാര്യ, കായിക മന്ത്രി അനുരാഗ് സിംഗ് ഠാക്കൂറിന് നൽകിയ പരാതിയിൽ പറയുന്നു.

ഈ വിഷയത്തിൽ എബിവിപിയും മറ്റു ചില സന്നദ്ധപ്രവർത്തകരും അലി സാബ്രിനെതീരെ രംഗത്ത് വന്നിരുന്നു. ഇത് ചോദ്യം ചെയ്തതോടെ വാട്സ്ആപ്പ് ഗ്രൂപ്പ് അഡ്മിന് മാത്രം സന്ദേശം അയക്കാൻ കഴിയുന്ന രീതിയിലേക്ക് അലി മാറ്റുകയും ധാർഷ്ട്യപൂർണ്ണമായ മറുപടി നൽകുകയും ചെയ്തു.

അതേസമയം അലി സാബ്രിനെ തൽസ്ഥാനത്തു നിന്നും നീക്കം ചെയ്യണമെന്ന് ആവശ്യപ്പെട്ടുകൊണ്ട് എബിവിപി നെഹ്റു യുവ കേന്ദ്ര സംസ്ഥാന കാര്യാലയത്തിന് മുന്നിൽ പ്രതിഷേധിച്ചിരുന്നു.കേന്ദ്ര സർക്കാർ തന്നെ മലബാർ കലാപം സ്വാതന്ത്ര്യ സമരത്തിന്റെ ഭാഗമല്ല എന്ന രീതിയിലുള്ള പഠനറിപ്പോർട്ടുകൾ പുറത്തുവിട്ട സാഹചര്യത്തിൽ കേന്ദ്രസർക്കാറിനെ പോലും വെല്ലുവിളിക്കുന്ന രീതിയിലാണ് ഈ ഉദ്യോഗസ്ഥൻ പ്രവർത്തിക്കുന്നത് എന്ന് എബിവിപി ചൂണ്ടിക്കാട്ടുകയും ചെയ്തു.

ഇക്കഴിഞ്ഞ ഇടയ്ക്കാണ് വാരിയൻകുന്നൻ, ആലി മുസ്‌ല്യാർ എന്നിവരുൾപ്പെടെ 387 പേരെ സ്വാതന്ത്ര്യസമര രക്തസാക്ഷിപ്പട്ടികയിൽനിന്ന് ഇന്ത്യൻ ചരിത്ര ഗവേഷണ കൗൺസിൽ നീക്കം ചെയ്യാൻ തീരുമാനിച്ചത്. മാത്രമല്ല മാപ്പിള ലഹളയ്‌ക്ക് ഇന്ത്യയുടെ സ്വാതന്ത്ര്യ സമരവുമായി യാതൊരു ബന്ധവുമില്ലെന്നും ഐസിഎച്ച്ആർ വ്യക്തമാക്കിയിരുന്നു.

പ്രത്യേക അറിയിപ്പ്: കോവിഡ് മഹാമാരിയുടെ രണ്ടാം വരവിന്റെ കാലത്ത് എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹിക അകലം പാലിച്ചും വാക്‌സിൻ എടുത്തും പ്രതിരോധത്തിന് തയ്യാറാവണമെന്ന് തത്വമയി ന്യൂസ് അഭ്യർത്ഥിക്കുന്നു. ഓർക്കുക ഒന്നിച്ചു നിന്നാൽ നമുക്കീ മഹാമാരിയെ തോൽപ്പിക്കാനാവും. “സർക്കാർ നിർദ്ദേശങ്ങൾ പാലിക്കാം, നമുക്ക് മഹാമാരിയെ ഒന്നിച്ചു നേരിടാം”. വാക്സിന് എടുത്തും, സാമൂഹിക അകലം പാലിച്ചും, മാസ്ക് ധരിച്ചും ഈ മഹാമാരിയെ നമുക്ക് എത്രയുംവേഗം വേരോടെ പിഴുതെറിയാം. #BreakTheChain #CovidBreak #IndiaFightsCorona