ദില്ലി വനിതാ കമ്മീഷന് പുതിയ നേതൃത്വം; അധ്യക്ഷയായി ബിജെപി നേതാവ് ലതാ ഗുപ്ത

ന്യൂദില്ലി: ദില്ലി വനിതാ കമ്മീഷന് ഒടുവിൽ പുതിയ നേതൃത്വം. രണ്ട് വർഷത്തിലേറെയായി ഒഴിഞ്ഞുകിടന്നിരുന്ന അധ്യക്ഷ സ്ഥാനത്തേക്ക് ബിജെപി നേതാവായ ലതാ ഗുപ്തയെ നിയമിച്ചതായി ദില്ലി മുഖ്യമന്ത്രിയുടെ ഓഫീസ് ഔദ്യോഗികമായി അറിയിച്ചു. കമ്മീഷൻ അംഗങ്ങളായി ശ്യാം ബാല, മാൾതി വർമ്മ, ലതാ സിധി, സൻരക്ഷിക ശർമ്മ ഝ, രേണു ഭല്ല എന്നിവരെയും നിയമിച്ചു.

മുൻ അധ്യക്ഷയായ സ്വാതി മലിവാൾ 2024 ജനുവരിയിൽ രാജ്യസഭാംഗമായി തിരഞ്ഞെടുക്കപ്പെട്ടതിനെ തുടർന്ന് രാജിവെച്ച ശേഷമാണ് വനിതാ കമ്മീഷന്റെ തലപ്പത്ത് രണ്ട് വർഷത്തിലേറെയായി സ്ഥിരം നേതൃത്വം ഇല്ലാതിരുന്നത്. പുതിയ നിയമനത്തോടെ കമ്മീഷൻ വീണ്ടും പൂർണ സജ്ജമാകുകയാണ്.

സ്ത്രീകളുടെ സുരക്ഷ, അന്തസ്, അവകാശ സംരക്ഷണം, ശാക്തീകരണം എന്നിവ ഉറപ്പാക്കുന്നതിൽ വനിതാ കമ്മീഷന് നിർണായക ഉത്തരവാദിത്വമാണുള്ളതെന്ന് ദില്ലി മുഖ്യമന്ത്രിയുടെ ഓഫീസ് വ്യക്തമാക്കി. സ്ത്രീകളുമായി ബന്ധപ്പെട്ട പരാതികളിൽ കൂടുതൽ വേഗതയോടെയും കാര്യക്ഷമമായും ഇടപെടാൻ പുതിയ നേതൃത്വം സഹായകരമാകുമെന്നാണ് വിലയിരുത്തൽ.

നിയമനത്തിന് പിന്നാലെ പ്രതികരിച്ച ലതാ ഗുപ്ത, “സ്ത്രീസുരക്ഷയാണ് എന്റെ ഏറ്റവും വലിയ മുൻഗണന. എല്ലാ സ്ത്രീകൾക്കും ഭയമില്ലാതെ, ആത്മവിശ്വാസത്തോടെ വനിതാ കമ്മീഷനെ സമീപിക്കാൻ കഴിയുന്ന അന്തരീക്ഷം സൃഷ്ടിക്കുകയാണ് എന്റെ ആദ്യ ഉത്തരവാദിത്തം” എന്ന് വ്യക്തമാക്കി.

നിലവിൽ ബിജെപിയുടെ ദില്ലി യൂണിറ്റിന്റെ വൈസ് പ്രസിഡന്റായ ലതാ ഗുപ്ത, ലക്ഷ്മി നഗർ നിയമസഭാ മണ്ഡലത്തിലെ രണ്ട് വ്യത്യസ്ത വാർഡുകളെ പ്രതിനിധീകരിച്ച മുനിസിപ്പൽ കൗൺസിലറായും പ്രവർത്തിച്ചിട്ടുണ്ട്. പുതിയ ചുമതലയിലൂടെ ദില്ലിയിലെ വനിതാ സുരക്ഷയും ക്ഷേമവുമായി ബന്ധപ്പെട്ട പ്രവർത്തനങ്ങൾക്ക് കൂടുതൽ ശക്തിയും ദിശാബോധവും ലഭിക്കുമെന്ന പ്രതീക്ഷയിലാണ് ഭരണകൂടം.