മലപ്പുറം അകമ്പാടത്ത് സ്വകാര്യ ആശുപത്രിയിലെ ശുചിമുറിയിൽ നവജാത ശിശുവിനെ ഉപേക്ഷിച്ച നിലയിൽ ! പോലീസ് അന്വേഷണം ആരംഭിച്ചു

നിലമ്പൂർ: മലപ്പുറം നിലമ്പൂർ അകമ്പാടത്തെ സ്വകാര്യ ആശുപത്രിയിൽ നവജാത ശിശുവിനെ ശുചിമുറിയിലെ ബക്കറ്റിൽ ഉപേക്ഷിച്ച നിലയിൽ കണ്ടെത്തി. ചാലിയാർ സ്വദേശിനിയായ യുവതിയാണ് പ്രസവിച്ച ശേഷം കുഞ്ഞിനെ ഉപേക്ഷിച്ചു കടന്നുകളഞ്ഞത്.

കടുത്ത വയറുവേദനയെ തുടർന്നാണ് ഇന്നലെ അർദ്ധരാത്രി പന്ത്രണ്ട് മണിയോടെ യുവതി ചികിത്സ തേടി ആശുപത്രിയിൽ എത്തിയത്. എന്നാൽ ആ സമയത്ത് ഗൈനക്കോളജിസ്റ്റ് ലഭ്യമാകാതിരുന്നതിനാൽ ജീവനക്കാർ യുവതിയോട് മറ്റൊരു ആശുപത്രിയിലേക്ക് മാറാൻ നിർദ്ദേശിക്കുകയായിരുന്നു. തുടർന്ന് ആശുപത്രിയിൽ നിന്നും പുറത്തിറങ്ങുന്നതിനിടെ ശുചിമുറിയിൽ കയറിയ യുവതി അവിടെവെച്ച് പ്രസവിക്കുകയും കുഞ്ഞിനെ ബക്കറ്റിനുള്ളിൽ ഉപേക്ഷിച്ച് കടന്നുകളയുകയുമായിരുന്നു.

ഇന്ന് രാവിലെ ശുചിമുറി വൃത്തിയാക്കാൻ എത്തിയ ശുചീകരണ തൊഴിലാളികളാണ് ബക്കറ്റിനുള്ളിൽ കുഞ്ഞിനെ കണ്ടെത്തിയത്. തുടർന്ന് ഇവർ ഉടൻ തന്നെ വിവരം ആശുപത്രി അധികൃതരെയും പോലീസിനെയും അറിയിക്കുകയായിരുന്നു. സംഭവത്തിൽ നിലമ്പൂർ പോലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്.