നിര്‍ഭയ കേസ് പ്രതികളെ തൂക്കിലേറ്റില്ല

ദില്ലി : രാജ്യത്തെ നടുക്കിയ നിര്‍ഭയ കേസിലെ പ്രതികളുടെ വധശിക്ഷ നാളെ നടക്കില്ല. നിര്‍ഭയ കേസ് പ്രതികളെ ഫെബ്രുവരി ഒന്നിന് തൂക്കിലേറ്റാനുള്ള വിധി പട്യാല ഹൗസ് കോടതി സ്റ്റേ ചെയ്തു. വിധി നടപ്പിലാവാന്‍ മണിക്കൂറുകള്‍ മാത്രം ബാക്കിനില്‍ക്കെയാണ് കോടതിയുടെ നിര്‍ണായകമായ ഉത്തരവ് പുറത്തുവന്നിരിക്കുന്നത്.

നിര്‍ഭയ കേസിലെ നാല് പ്രതികളുടെ വധശിക്ഷ നടപ്പിലാക്കുന്നത് ഇനിയൊരു ഉത്തരവ് ഉണ്ടാവുന്നത് വരെ നീട്ടിവെച്ചിരിക്കുന്നു എന്നായിരുന്നു കോടതി ഉത്തരവ് വന്നത്. ജസ്റ്റിസ് ധര്‍മേന്ദറാണ് തുറന്ന കോടതിയില്‍ വിധി വായിച്ചത്.

പ്രതികളായ അക്ഷയ് കുമാര്‍ വിനയ് ശര്‍മ എന്നിവരാണ് ഹര്‍ജി നല്‍കിയത്. തങ്ങളുടെ ദയാഹര്‍ജിയില്‍ രാഷ്ട്രപതി ഇതുവരെയും തീരുമാനമെടുത്തില്ലെന്ന് ചൂണ്ടിക്കാട്ടിയാണ് ഇരുവരും ഹര്‍ജി സമര്‍പ്പിച്ചത്. ദയാഹര്‍ജിയില്‍ രാഷ്ട്രപതി തീരുമാനമെടുത്തില്ല, തിരുത്തല്‍ ഹര്‍ജി തള്ളിയതിന് ശേഷം 14 ദിവസത്തിന് ശേഷം മാത്രമേ വിധി നടപ്പിലാക്കാവൂ എന്ന ജയില്‍ച്ചട്ടം ലംഘിച്ചു. തുടങ്ങിയ വധശിക്ഷ നടപ്പിലാക്കുന്നതിന് മുന്‍പുള്ള നിയമപരമായ അവകാശങ്ങള്‍ പ്രതികള്‍ക്ക് ലഭിച്ചില്ലെന്നായിരുന്നു പ്രതികള്‍ക്ക് വേണ്ടി അഭിഭാഷകന്‍ കോടതിയെ അറിയിച്ചത്. ഹര്‍ജിയില്‍ ഇന്ന് ഉച്ചയ്ക്ക് രണ്ട് മണിക്ക ഉത്തരവ് പറയുമെന്നായിരുന്നു കോടതി അറിയച്ചതെങ്കിലും അഞ്ച് മുക്കാലോടെയാണ് വിധി വന്നത്.