പെൻഷൻ നൽകാനോ ശമ്പളം നൽകാനോ പണമില്ല, പോസ്റ്റർ അടിച്ചിറക്കാൻ പണമുണ്ടല്ലോ? നവകേരള സദസിനായി അടിച്ചിറക്കിയത് 25 ലക്ഷം പോസ്റ്ററുകൾ! സി ആപ്റ്റിന് 9.16 കോടി രൂപ അനുവദിച്ച് ധനവകുപ്പ്

തിരുവനന്തപുരം: സര്‍ക്കാര്‍ ജീവനക്കാരുടെ ശമ്പള വിതരണമടക്കം തടസ്സപ്പെടുന്ന സാഹചര്യത്തിലേക്ക് സാമ്പത്തിക പ്രതിസന്ധി രൂക്ഷമായിരിക്കുമ്പോഴും നവകേരള സദസിന്‍റെ കോടികളുടെ ബില്ല് പാസാക്കി തുക അനുവദിച്ച് ധനവകുപ്പ്. നവ കേരള സദസിന്റെ പ്രചരണത്തിനായി മുഖ്യമന്ത്രിയുടെ പടം വച്ച് അടിച്ചിറക്കിയത് 25.40 ലക്ഷം രൂപയുടെ പോസ്റ്ററാണ്. ഇതിനായി സി ആപ്റ്റിന് 9.16 കോടി രൂപയാണ് അനുവദിച്ചിരിക്കുന്നത്. എന്നാൽ യാതൊരു ക്വട്ടേഷനും നൽകാതെയാണ് പിആർഡി കരാർ സി ആപ്റ്റിന് നൽകിയതെന്നാണ് റിപ്പോർട്ടുകൾ സൂചിപ്പിക്കുന്നത്.

ക്ഷേമ പെൻഷൻ, സർക്കാർ ജീവനക്കാരുടെ പെൻഷൻ, ശമ്പളം തുടങ്ങി വിവിധ ഇനങ്ങളിൽ കോടിക്കണക്കിന് രൂപയാണ് കുടിശ്ശികയായി സർക്കാർ നൽകാനുള്ളത്. ഇതിനിടയിലും മന്ത്രി മന്ദിരങ്ങളുടെ അറ്റകുറ്റപ്പണികൾക്കും നവ കേരള സദസിനുമായി പോസ്റ്ററുകൾ അടിച്ചിറക്കിയ വകയിലും കോടിക്കണക്കിന് രൂപയാണ് ധനംവകുപ്പ് അനുവദിച്ചിരിക്കുന്നത്. മുഖ്യമന്ത്രിയുടെ മുഖാമുഖം പരിപാടിക്കും 33 ലക്ഷം രൂപ അനുവദിച്ചിട്ടുണ്ട്.

കർഷകർക്ക് പല സബ്സിഡി ഇനങ്ങളിൽ കോടികണക്കിന് രൂപ കുടിശികയുള്ളപ്പോഴാണ് മുഖാമുഖത്തിന് തുക അനുവദിച്ചത്. ഹോർട്ടികോർപ്പിന് പച്ചക്കറി വിറ്റവകയിൽ നൽകാനുള്ളത് കോടികള്‍, പമ്പിംഗ് സബ്സിഡി, വിള നാശ നഷ്ടപരിഹാരം എന്നീ ഇനങ്ങളിലും കോടികളുടെ കുടിശ്ശികയാണുള്ളത്. ഇതിനിടെയാണ് കാർഷിക മേഖലയിലെ മുഖാമുഖത്തിനുള്ള 33 ലക്ഷം അനുവദിച്ചത്.