കൊടുമ്പിരി കൊണ്ട് ബലൂൺ യുദ്ധം ! ഉത്തരകൊറിയയുടെ മാലിന്യ ബലൂൺ ദക്ഷിണകൊറിയൻ പ്രസിഡന്റിന്റെ ഔദ്യോഗിക വസതിയിൽ പതിച്ചു

മാലിന്യങ്ങൾ നിറച്ച ഉത്തരകൊറിയയുടെ ഹീലിയം ബലൂൺ ദക്ഷിണകൊറിയൻ പ്രസിഡന്റിന്റെ ഔദ്യോഗിക വസതിയിൽ പതിച്ചതായി അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്തു. പ്ലാസ്റ്റിക്, പേപ്പര്‍, സിഗരറ്റ് കുറ്റികള്‍ തുടങ്ങിയവയും മനുഷ്യവിസര്‍ജ്യമുള്‍പ്പെടെയുള്ള മറ്റു മാലിന്യങ്ങളും നിറച്ച ഹീലിയം ബലൂണുകളാണ് ഉത്തരകൊറിയ ദക്ഷിണ കൊറിയയിലേക്ക് വിക്ഷേപിക്കുന്നത്. കഴിഞ്ഞ കുറേ മാസങ്ങളായി ഈ രീതി ഉത്തരകൊറിയ തുടർന്നു വരികയാണ്. എന്നാൽ ഇതാദ്യമായാണ് പ്രസിഡന്റിന്റെ ഔദ്യോഗിക വസതി തന്നെ ലക്ഷ്യമാക്കി ബലൂണുകളെത്തുന്നത്.

ഇന്നലെ രാവിലെ ദക്ഷിണകൊറിയന്‍ പ്രസിഡന്റ് യൂന്‍ സുക് യോളിയന്റെ വീട്ടുവളപ്പിലേക്കാണ് മാലിന്യ ബലൂണുകളിലൊന്ന് വിക്ഷേപിച്ചത്. രണ്ടാം തവണയാണ് ഇങ്ങനെ സംഭവിക്കുന്നത്. അപകടകരമായ വസ്തുക്കളൊന്നും സഞ്ചിയിലുണ്ടായിരുന്നില്ലെങ്കിലും പ്രസിഡന്റിനെയും ഭാര്യ കിം ക്യോന്‍ ഹീയെയും വിമര്‍ശിക്കുന്ന ലഘുലേഖകള്‍ അതിലുണ്ടായിരുന്നു. ലക്ഷ്യസ്ഥാനങ്ങളില്‍ മാലിന്യസഞ്ചി കൃത്യമായി ഇറക്കാനുള്ള ജിപിഎസ് സാങ്കേതികവിദ്യ ഈ ബലൂണുകളിലുണ്ട്.