ബൈക്ക് യാത്രികനെ ഇടിച്ചിട്ട കാറിൽ കുപ്രസിദ്ധ ഗുണ്ടാനേതാവ് ഓംപ്രകാശ് ! കരുതല്‍ കസ്റ്റഡിയിലെടുത്ത് പോലീസ്; മദ്യപിച്ച് വാഹനമോടിച്ച് അപകടമുണ്ടാക്കിയതിന് സുഹൃത്തിനെതിരെ കേസ്

തിരുവനന്തപുരം : കുപ്രസിദ്ധ ഗുണ്ടാനേതാവ് ഓംപ്രകാശിനെ പോലീസ് കസ്റ്റഡിയിലെടുത്തു. തുമ്പ പോലീസാണ് ഇന്നലെ രാത്രി ഓംപ്രകാശിനെ കസ്റ്റഡിയിലെടുത്തത്.

ഇന്നലെ രാത്രി തുമ്പ സ്റ്റേഷന്‍ പരിധിയിലെ ബൈപ്പാസ് റോഡില്‍ ബൈക്ക് യാത്രക്കാരനെ ഒരു കാര്‍ ഇടിച്ചിട്ടിരുന്നു. തുടർന്ന് ഇരു കൂട്ടരും തമ്മിൽ വാക്ക് തർക്കമുണ്ടായി. തുടര്‍ന്ന് പോലീസ് സ്ഥലത്തെത്തിയപ്പോഴാണ് അപകടമുണ്ടാക്കിയ കാറില്‍ ഡ്രൈവര്‍ക്കൊപ്പം ഓംപ്രകാശിനെയും കണ്ടത്.
കാര്‍ ഓടിച്ചിരുന്നയാള്‍ മദ്യലഹരിയിലാണെന്നും കണ്ടെത്തി. തുടർന്ന് ഓംപ്രകാശിനെയും കാറോടിച്ച സുഹൃത്തിനെയും കസ്റ്റഡിയിലെടുക്കുകയായിരുന്നു. മദ്യപിച്ച് വാഹനമോടിച്ച് അപകടമുണ്ടാക്കിയതിന് ഓംപ്രകാശിന്റെ സുഹൃത്തിനെതിരെ പോലീസ് കേസെടുത്തിട്ടുണ്ട്. അതേസമയം, ഓം പ്രകാശിനെതിരെ പുതിയ കേസുകളില്ലെന്നും കരുതല്‍ കസ്റ്റഡി മാത്രമാണെന്നുമാണ് പോലീസിന്റെ വിശദീകരണം. . ഇവരുടെ യാത്രയുടെ വിശദാംശങ്ങളും മറ്റും വിശദമായി ചോദിച്ചറിഞ്ഞശേഷം ഓംപ്രകാശിനെ വിട്ടയക്കുമെന്നും പോലീസ് വൃത്തങ്ങൾ വ്യക്തമാക്കി.