നിയമസഭയിൽ കറുപ്പണിഞ്ഞ് പ്രതിപക്ഷം ; സഭയിൽ മാദ്ധ്യമ വിലക്ക് തുടരുന്നു

തിരുവനന്തപുരം: മുഖ്യമന്ത്രിയുടെ പരിപാടികളിൽ കറുപ്പിന് വിലക്കേർപ്പെടുത്തിയതിൽ പ്രതിഷേധിച്ച് കോൺഗ്രസിന്റെ യുവ എംഎൽഎമാർ ഇന്ന് നിയമസഭയിൽ കറുത്ത ഷർട്ട് ധരിച്ചാണ് എത്തിയത്. കറുത്ത വസ്ത്രമണിഞ്ഞവരെ തടയുകയും കസ്റ്റഡിയിലെടുക്കുകയും ചെയ്തതിനെതിരെയുള്ള പ്രതിഷേധമാണിത്. സർക്കാരിനെതിരായ പ്ലക്കാർഡുകളുമായാണ് പ്രതിപക്ഷം സഭയിലെത്തിയത്. ഷാഫി പറമ്പിൽ ഉൾപ്പെടെയുള്ള കോണ്ഗ്രസ് നേതാക്കളാണ് കറുപ്പണിഞ്ഞ് സഭയിലെത്തിയത്.

അതേസമയം മാദ്ധ്യമ വിലക്ക് ഇപ്പോഴും തുടരുകയാണ്. മാദ്ധ്യമങ്ങൾക്ക് വിലക്കേർപ്പെടുത്തിയതിനാലും സഭാ ടിവി പ്രതിഷേധം സംപ്രേക്ഷണം ചെയ്യാതിരുന്നതിനാലും ഇതൊന്നും പൊതുജനങ്ങൾക്ക് കാണാനാവില്ലെന്നുമാണ് പ്രതിപക്ഷത്തിന്റെ ആരോപണം. പ്രതിപക്ഷത്തിൻ്റെ പ്രതിഷേധങ്ങൾ സംപ്രേക്ഷണം ചെയ്യാത്ത സഭാ ടിവിയുടെ നടപടിക്കെതിരെ നേരത്തെ പ്രതിപക്ഷ നേതാവ് വിഡി സതീശൻ തന്നെ രംഗത്ത് എത്തിയിരുന്നു. ഭരണപക്ഷത്തിന് വേണ്ടി മാത്രം പ്രവർത്തിക്കുന്ന ചാനലായി സഭാ ടിവി മാറിയെന്നും അദ്ദേഹം ആരോപിച്ചിരുന്നു.