പഹൽഗാം ഭീകരാക്രമണം: ജന്മനാടിനെ നാടിനെ ഒറ്റിയ ഒരാൾ കൂടി പിടിയിൽ; അറസ്റ്റിലായത് ഭീകരർക്ക് ആവശ്യമായ ക്രമീകരണങ്ങൾ ചെയ്തു കൊടുത്ത മുഹമ്മദ് യൂസഫ് കഠാരിയ

ശ്രീനഗർ: രാജ്യത്തെ ഞെട്ടിച്ച പഹൽഗാം ഭീകരാക്രമണത്തിൽ ഭീകരർക്ക് ആവശ്യമായ സഹായങ്ങൾ നൽകിയ ഒരാളെ ജമ്മു-കശ്മീർ പോലീസ് അറസ്റ്റ് ചെയ്തു. മുഹമ്മദ് യൂസഫ് കഠാരിയ (26) എന്നയാളാണ് കുൽഗാം ജില്ലയിൽ നിന്ന് പിടിയിലായത്,.

‘ഓപ്പറേഷൻ മഹാദേവ്’ സൈനിക നടപടിയിൽ കൊല്ലപ്പെട്ട ഭീകരരിൽ നിന്ന് കണ്ടെടുത്ത ആയുധങ്ങളുടെ ഫോറൻസിക് പരിശോധനയിൽ നിന്നാണ് കഠാരിയയെക്കുറിച്ചുള്ള നിർണായക വിവരങ്ങൾ ലഭിച്ചത്. ഈ തോക്കുകളിൽ നിന്ന് വെടിയുണ്ടകൾ പുറത്തെടുത്ത് പഹൽഗാമിൽ നിന്ന് കണ്ടെത്തിയവയുമായി ഒത്തുനോക്കിയപ്പോൾ ഈ ആയുധങ്ങൾ തന്നെയാണ് ആക്രമണത്തിന് ഉപയോഗിച്ചതെന്ന് സ്ഥിരീകരിച്ചു.’ഓപ്പറേഷൻ മഹാദേവിൽ ‘ മൂന്ന് ഭീകരരെ സൈന്യം വധിച്ചിരുന്നു. പഹൽഗാം ആക്രമണത്തിന്റെ സൂത്രധാരനായി കരുതുന്ന സുലൈമാൻ എന്ന ആസിഫ്, ജിബ്രാൻ, ഹംസ അഫ്ഗാനി എന്നീ ഭീകരരാണ് സൈനിക നടപടിയിൽ കൊല്ലപ്പെട്ടത്. ഇതിൽ ജിബ്രാൻ 2024 ഒക്ടോബറിൽ സോനാമാർഗ് തുരങ്കത്തിൽ നടന്ന ആക്രമണത്തിലും പങ്കാളിയായിരുന്നു.

പഹൽഗാമിലെ ബൈസരൺ താഴ്‌വരയിൽ വെച്ച് നടന്ന ഭീകരാക്രമണത്തിൽ 26 പേരാണ് കൊല്ലപ്പെട്ടത്. കൊല്ലപ്പെട്ടവരിൽ ഭൂരിഭാഗവും വിനോദസഞ്ചാരികളായിരുന്നു. അറസ്റ്റിലായ കഠാരിയയെ കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ റിമാൻഡ് ചെയ്യുമെന്ന് അധികൃതർ അറിയിച്ചു.