വെടിനിര്‍ത്തല്‍ ധാരണയിലെത്തിച്ചേരാന്‍ അപേക്ഷിച്ച് ഇങ്ങോട്ട് സമീപിച്ചത് പാകിസ്ഥാൻ ! മൂന്നാംകക്ഷിയുടെ ഇടപെടലുണ്ടായിട്ടില്ലെന്നാവർത്തിച്ച് പ്രധാനമന്ത്രി നരേന്ദ്രമോദി

ദില്ലി: ഇന്ത്യ – പാക് സംഘർഷത്തിലെ വെടിനിര്‍ത്തല്‍ ധാരണയിൽ മൂന്നാംകക്ഷിയുടെ ഇടപെടലുണ്ടായിട്ടില്ലെന്ന് വീണ്ടുമവർത്തിച്ച് പ്രധാനമന്ത്രി നരേന്ദ്രമോദി. ദില്ലയിൽ ഇന്ന് ചേർന്ന എന്‍ഡിഎ നേതാക്കളുടെ യോഗത്തിലാണ് ഇക്കാര്യം അദ്ദേഹം വ്യക്തമാക്കിയതെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്തു. വെടിനിര്‍ത്തല്‍ ധാരണയിലെത്തിച്ചേരാന്‍ അപേക്ഷിച്ച് പാക് ഭരണകൂടം ഇന്ത്യയെ ഇങ്ങോട്ട് സമീപിക്കുകയായിരുന്നെന്നും മോദി കൂട്ടിച്ചേര്‍ത്തു.

എന്‍ഡിഎ സര്‍ക്കാര്‍ ഭരിക്കുന്ന സംസ്ഥാനങ്ങളില്‍നിന്നുള്ള മുഖ്യമന്ത്രിമാരും ഉപമുഖ്യമന്ത്രിമാരുമായിരുന്നു യോഗത്തില്‍ പങ്കെടുത്തത്. ഇരു രാജ്യങ്ങളും വെടിനിര്‍ത്തല്‍ ധാരണയിലെത്തിച്ചേര്‍ന്നതിന് പിന്നാലെ തന്റെ ഇടപെടലാണ് ധാരണയിലെത്താൻ നിർണ്ണായകമായതെന്ന അവകാശവാദവുമായി അമേരിക്കന്‍ പ്രസിഡന്റ് ഡൊണാള്‍ഡ് ട്രമ്പ് രംഗത്തെത്തിയിരുന്നു. ഈ അവകാശവാദത്തെ ഇന്ത്യ തള്ളിക്കളഞ്ഞിരുന്നെങ്കിലും ട്രമ്പ് പിന്നീടും ഇക്കാര്യം ആവർത്തിച്ചിരുന്നു.