ശ്രീനിവാസ് കൊലക്കേസ്; സർവ്വകക്ഷി യോഗം ഇന്ന്; അതീവ ജാഗ്രതയിൽ പാലക്കാട്

പാലക്കാട് : ആർഎസ്എസ് മുൻ ശാരീരിക് ശിക്ഷൺ പ്രമുഖ് ശ്രീനിവാസൻ എസ്ഡിപിഐ ഗുണ്ടകളുടെ ആക്രമണത്തിൽ കൊല്ലപ്പെട്ട സംഭവത്തിൽ വിളിച്ചു ചേർത്ത സർവ്വ കക്ഷി യോഗം ഇന്ന്. ഉച്ചയ്‌ക്ക് മൂന്നരയ്‌ക്ക് കളക്ടറേറ്റിലാണ് യോഗം ചേരുക. യോഗത്തിൽ ബിജെപിയും പങ്കാളിത്തം വഹിക്കും.

വൈദ്യുത മന്ത്രി കെ. കൃഷ്ണൻകുട്ടിയുടെ അദ്ധ്യക്ഷതയിലാണ് യോഗം നടക്കുക. ബിജെപിയ്‌ക്കായി ജില്ലാ അദ്ധ്യക്ഷൻ കെ. എം ഹരിദാസ്, സി കൃഷ്ണകുമാർ എന്നിവരാണ് യോഗത്തിൽ പങ്കെടുക്കുക.

അതേസമയം, ആലോചിച്ച ശേഷമേ യോഗത്തിൽ പങ്കെടുക്കുന്ന കാര്യത്തിൽ തീരുമാനമെടുക്കുകയുള്ളൂവെന്ന് ഇന്നലെ ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ പറഞ്ഞിരുന്നു. മതഭീകരർക്കൊപ്പം ഒരു മേശയ്‌ക്ക് ചുറ്റും ഇരുന്ന് എന്ത് സംസാരിക്കാനാണ് എന്നായിരുന്നു അദ്ദേഹത്തിന്റെ ചോദ്യം.

അതേസമയം, രാഷ്‌ട്രീയ കൊലപാതകത്തിന്റെ പശ്ചാത്തലത്തിൽ പാലക്കാട് ജില്ലയിൽ അതീവ ജാഗ്രത തുടരുകയാണ്. തമിഴ്‌നാട്ടിൽ നിന്നുള്ള പോലീസ് സംഘത്തെ ജില്ലയിൽ സുരക്ഷയ്‌ക്കായി വിന്യസിച്ചിട്ടുണ്ട്. ബുധനാഴ്ച വരെയാണ് നിരോധനാജ്ഞ ഏർപ്പെടുത്തിയിരിക്കുന്നത്.