വിമാനയാത്രയ്ക്കിടെ പാനിക് അറ്റാക്ക്; സഹയാത്രികന്റെ മർദനവും! യുവാവിനെ കാണാനില്ലെന്ന് പരാതി

ഗുവാഹത്തി: ഇൻഡിഗോ വിമാനത്തിൽ സഹയാത്രികന്റെ മർദനമേറ്റതിന് പിന്നാലെ അസം സ്വദേശിയായ യുവാവിനെ കാണാനില്ലെന്ന് പരാതി. അസമിലെ കച്ചാർ ജില്ലക്കാരനായ ഹുസൈൻ അഹ്‌മദ് മജുംദാറി(32)നെയാണ് കാണാതായത്. സംഭവത്തിൽ ഉധർബോന്ദ് പോലീസ് സ്റ്റേഷനിൽ കുടുംബം പരാതി നൽകി.

മുംബൈയിൽ നിന്ന് കൊൽക്കത്തയിലേക്കുള്ള ഇൻഡിഗോയുടെ 6E 2387 വിമാനത്തിലെ യാത്രക്കാരനായിരുന്ന ഹുസൈന്, യാത്രയ്ക്കിടെ പാനിക് അറ്റാക്കുണ്ടായി. ഇതോടെ അസ്വസ്ഥനായ ഹുസൈനെ സഹായിക്കാനെത്തിയ ക്രൂ അംഗങ്ങൾക്കുമുന്നിൽ വെച്ച് സഹയാത്രക്കാരൻ ഹുസൈനെ മർദിക്കുകയായിരുന്നു. ഹഫിജുൽ റഹ്മാൻ എന്നയാളാണ് ഹുസൈനെ മർദിച്ചത്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയും ചെയ്തിരുന്നു.

വിമാനം കൊൽക്കത്തയിൽ ഇറങ്ങിയപ്പോൾ ഹഫിജുലിനെ പോലീസിന് കൈമാറിയിരുന്നു. എന്നാൽ കൊൽക്കത്തയിൽ നിന്ന് സിൽച്ചറിലേക്ക് അടുത്ത വിമാനത്തിൽ എത്തേണ്ടിയിരുന്ന ഹുസൈൻ ഇതുവരെ വീട്ടിലെത്തുകയോ ബന്ധപ്പെടുകയോ ചെയ്തിട്ടില്ലെന്ന് കുടുംബം പറയുന്നു. മുംബൈയിലെ ഒരു ഹോട്ടലിൽ ജീവനക്കാരനാണ് ഹുസൈൻ. ഹുസൈന്റെ ഫോൺ സ്വിച്ച് ഓഫ് ആയ നിലയിലാണ്. മകനെ പ്രതീക്ഷിച്ചു സിൽച്ചർ വിമാനത്താവളത്തിലെത്തിയ ബന്ധുക്കൾക്ക് അദ്ദേഹത്തെ കണ്ടെത്താനായില്ല. പിന്നീട് മർദനവിവരം അറിഞ്ഞപ്പോഴാണ് സംഭവം പുറത്തറിയുന്നത്. മകനെ കാണാതായതോടെ ആശങ്കയിലാണ് കുടുംബം.