ഇന്ന് നടന്ന പത്താംക്ലാസ്സ് ക്രിസ്‌തുമസ്‌ പരീക്ഷാ ചോദ്യപേപ്പറും ചോർന്നു ? 40 ൽ 32 മാർക്കിനുള്ള ചോദ്യങ്ങളും എം എസ് സൊല്യൂഷൻസ് ഇന്നലെ പുറത്തുവിട്ടിരുന്നത്; ചോദ്യങ്ങൾക്ക് പണം ഈടാക്കിയിരുന്നെന്ന് സംശയം

തിരുവനന്തപുരം: ഇന്ന് നടന്ന പത്താംക്ലാസ്സ് ക്രിസ്തുമസ് പരീക്ഷാ ചോദ്യപേപ്പറും ചോർന്നതായി സംശയം. ചോദ്യപേപ്പറിൽ ഉണ്ടായിരുന്ന 40 ൽ 32 മാർക്കിനുള്ള ചോദ്യങ്ങളും എം എസ് സൊല്യൂഷൻസ് ഇന്നലെ പുറത്തുവിട്ടിരുന്നതാണെന്ന് ആരോപണം. ചോദ്യപേപ്പർ വിവാദത്തിൽ അന്വേഷണ പരിധിയിലുള്ള ഓൺലൈൻ സ്ഥാപനമാണ് കൊടുവള്ളി ആസ്ഥാനമായി പ്രവർത്തിക്കുന്ന എം എസ് സൊല്യൂഷൻസ്.

വിവാദങ്ങൾ ഉയർന്നതിനെ തുടർന്ന് എം എസ് സൊല്യൂഷൻസിന്റെ യൂട്യൂബ് ചാനലിന്റെ പ്രവർത്തനം നിലച്ചിരുന്നു. എന്നാൽ ഇന്നലെ രാവിലെയോടെ ചാനൽ വീണ്ടും പ്രത്യക്ഷപ്പെട്ടു. ചാനൽ സി ഇ ഒ ഷുഹൈബ് കെമിസ്ട്രി ക്ലാസുകൾ കൈകാര്യം ചെയ്‌തിരുന്നു. ഇതിൽ പറഞ്ഞ ചോദ്യങ്ങളാണ് ഇന്ന് അതേപടി ചോദ്യപേപ്പറിൽ വന്നതെന്നാണ് ആരോപണം. 1500 രൂപ നൽകിയാൽ സ്ഥാപനത്തിന്റെ വാട്സ്ആപ്പ് കൂട്ടായ്മയിൽ അംഗമാകാകം എന്ന് അറിയിപ്പ് വന്നിരുന്നു. ധാരാളം വിദ്യാർത്ഥികൾ വാട്സ്ആപ്പ് കൂട്ടായ്മയിൽ പണം നൽകി അംഗമായതായാണ് സൂചന.