ജോജുവിനെ തല്ലേണ്ടിയിരുന്നു; പൊട്ടിത്തെറിച്ച് പിസി ജോർജ്ജ്

ജോജുവിനെ തല്ലേണ്ടിയിരുന്നു; പൊട്ടിത്തെറിച്ച് പിസി ജോർജ്ജ് | PC GEORGE

കോണ്‍ഗ്രസ് നടത്തിയ പ്രതിഷേധത്തിനെതിരെ രംഗത്തെത്തിയ നടന്‍ ജോജു ജോര്‍ജിനെ പിന്തുണച്ച് നിരവധി പേരാണ് രംഗത്തെത്തുന്നത്. സിപിഎം നേതാക്കളും സിനിമ മേഖലയിലുള്ളവരും ജോജുവിനെ പിന്തുണ അറിയിച്ച് രംഗത്തെത്തുമ്പോള്‍ താരത്തിനെതിരെ രൂക്ഷമായ ഭാഷയില്‍ വിമര്‍ശിച്ച് രംഗത്തെത്തിയിരിക്കുകയാണ് ജനപക്ഷം നേതാവും മുന്‍ എംഎല്‍എയുമായ പിസി ജോര്‍ജ്.

സമരം ചെയ്യുന്ന കോണ്‍ഗ്രസുകാരെ ആക്രമിക്കാന്‍ ജോജു ജോര്‍ജ് ആരാണെന്ന് പിസി ജോര്‍ജ് ചോദിച്ചു. അയാള്‍ക്കും കൂടി വേണ്ടിയല്ലേ സമരം ചെയ്തത്. ഞാനായിരുന്നുവെങ്കില്‍ ജോജു ജോര്‍ജ് ആശുപത്രിയില്‍ കിടക്കുമായിരുന്നു. ആയാളെ കണ്ടാല്‍ കള്ളുകുടിയനെ പോലെയാണ് ഇരിക്കുന്നത്. അയാള്‍ അവിടെ എത്തിയത് ഓട്ടോറിക്ഷയിലാണെന്ന വാദം തെറ്റാണ്. അങ്ങനെയെങ്കില്‍ ഞാന്‍ അദ്ദേഹത്തോടൊപ്പം നില്‍ക്കുമായിരുന്നു.

ഈ സമരം നടക്കുന്ന സമയത്ത് ജോജു എന്തിനാണ് അവിടെ പോയതെന്നും പിസി ജോര്‍ജ് ചോദിക്കുന്നു. കോണ്‍ഗ്രസ് ആയതുകൊണ്ടാണ് ഷൈന്‍ ചെയ്യാന്‍ നോക്കിയതെന്നും കമ്മ്യൂണിസ്റ്റുകാര്‍ ആയിരുന്നെങ്കില്‍ ജോജു ആശുപത്രിയിലാകുമായിരുന്നുവെന്നും അദ്ദേഹം പറഞ്ഞു. നാല് കാശ് കയ്യില്‍ വന്നപ്പോള്‍ എല്ലാം മറന്നുപോയോ എന്നും പിസി ജോര്‍ജ് കുറ്റപ്പെടുത്തി. ഒരു സിനിമ നടനായതുകൊണ്ട് ഷൈന്‍ ചെയ്‌തേക്കാം എന്ന് ജോജു കരുത്തിക്കാണും. ജനപക്ഷത്തിന്റെ സമരത്തിലാണ് ഇത് എല്ലാം ചെയ്തിരുന്നെങ്കില്‍ ജോജുവിനെ ആശുപത്രിയില്‍ കിടത്തിയേനെ എന്നും പിസി ജോര്‍ജ് ചോദിച്ചു. അതേസമയം, ജോജുവിന് വലിയ പിന്തുണയാണ് സോഷ്യല്‍ മീഡിയയില്‍ അടക്കം ലഭിക്കുന്നത്.