“സംസ്ഥാനത്ത് പ്രത്യേക ഉദ്ദേശത്തോടെ വിഷം ചീറ്റുന്നത് പിണറായി വിജയനും, അനുകൂലികളും എൽഡിഎഫും യുഡിഎഫും !” തുറന്നടിച്ച് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ

സംസ്ഥാനത്ത് പ്രത്യേക ഉദ്ദേശത്തോടെ വിഷം ചീറ്റുന്നത് പിണറായി വിജയനും, അനുകൂലികളും എൽഡിഎഫും യുഡിഎഫുമാണെന്ന് തുറന്നടിച്ച് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. ബിജെപി ദേശീയ അദ്ധ്യക്ഷൻ ജെ പി നദ്ദ ഉദ്‌ഘാടനം ചെയ്ത, സംസ്ഥാന സർക്കാരിനെതിരെയുള്ള എൻഡിഎ മുന്നണിയുടെ സെക്രട്ടറിയറ്റ് ഉപരോധത്തിൽ സംസാരിക്കുകയായിരുന്നു കെ.സുരേന്ദ്രൻ. 

‘‘മിസ്റ്റർ പിണറായി വിജയൻ, ഇവിടെ ആരാണ് വിഷം ചീറ്റുന്നത്? ഇവിടെ പ്രത്യേക ഉദ്ദേശത്തോടെ വിഷം ചീറ്റുന്നത് പിണറായി വിജയനും നിങ്ങളെ അനുകൂലിക്കുന്നവരുമാണ്. എൽഡിഎഫും, യുഡിഎഫുമാണ്. വിദേശരാജ്യത്ത് നടക്കുന്ന ഒരു യുദ്ധത്തിന്റെ മറവിൽ കേരളത്തിൽ ഹമാസിനു പരവതാനി വിരിക്കുന്നത് മറ്റാരുമല്ല. വിദ്വേഷം ഇവിടെ പ്രചരിപ്പിക്കുന്നത് നിങ്ങളാണ്. സ്‌നേഹത്തിന്റെ കടയിൽ കച്ചവടം നടത്തുന്ന എൽഡിഎഫും യുഡിഎഫുമാണ്.

യുഡിഎഫിലെ ഒരു പ്രധാനഘടകകക്ഷി സംഘടിപ്പിച്ച മഹാറാലിയിൽ ഹമാസ് ഭീകരർ ഭഗത് സിങ്ങിനെ പോലെയും ചന്ദ്രശേഖർ ആസാദിനെ പോലെയുമാണെന്നു പറയാൻ ധൈര്യം കാണിച്ചത്, മിസ്റ്റർ പിണറായി വിജയൻ നിങ്ങൾ മുഖ്യമന്ത്രി ആയിരിക്കുന്നത് കൊണ്ടാണ്. നിങ്ങളുടെ നേതാക്കൻമാരാണ് ഹമാസിനെ വെള്ളപൂശുന്നത്. പലസ്‌തീനിനെ അനുകൂലിക്കുന്നെന്ന മറവിൽ നിങ്ങൾ ഹമാസ് അനുകൂല പ്രകടനങ്ങളാണു നടത്തുന്നത്. ആയിരങ്ങളെ കൊന്നൊടുക്കിയ ഹമാസിനെ എന്തിനാണു നിങ്ങൾ വെള്ളപൂശുന്നത്.

മലപ്പുറത്ത് ഹമാസിന്റെ മുൻതലവൻ റാലിയിൽ പങ്കെടുക്കുന്നു. വിദ്വേഷത്തിന്റെ വിഷം ചീറ്റുന്നത് ബിജെപിയാണോ? സംഘപരിവാറാണോ? അതല്ല മതേതര മുന്നണികളാണോ? സ്‌നേഹത്തിന്റെ കടയിൽ കച്ചവടം നടത്തുന്ന യുഡിഎഫും എൽഡിഎഫുമാണോ? കേരളത്തിൽ ഹമാസിന്റെ തലവന് എങ്ങനെ ധൈര്യമായി പ്രസംഗിക്കാൻ കഴിയുന്നു? എന്തുകൊണ്ടാണ് പൊലീസ് നടപടിയെടുക്കാത്തത്. 

അഴിമതിയുടെയും ഭരണസ്തംഭനത്തിന്റെയും കള്ളപ്പണത്തിന്റെയുമടക്കം നിരവധി പ്രശ്നങ്ങള്‍ ഉന്നയിച്ചാണ് ബിജെപി സമരരംഗത്തുള്ളത്. ജനങ്ങൾ വറുതിയിലാണ്. സർക്കാർ സാമ്പത്തികമായി ഞെരുക്കമാണെന്നു പറയുമ്പോഴും കേരളീയമെന്ന ആഘോഷം നടത്തുകയാണ്. ഇതിലൂടെ എന്താണു സർക്കാർ, ജനങ്ങൾക്കായി നൽകുന്ന സന്ദേശം? ഈ സർക്കാർ ഏറ്റവും വലിയ അഴിമതി സർക്കാരാണ്. ഈ സർക്കാർ വർഗീയ ശക്തികളെ പിന്തുണയ്‌ക്കുന്നു. ഈ കൊള്ളക്കാരുടെ സർക്കാരിനെ താഴെയിറക്കുകയാണ് ബിജെപിയുടെ ലക്ഷ്യം.  കോൺഗ്രസിന് എത് അഴിമതിയിലാണ് പങ്കില്ലാത്തത്? ” – കെ.സുരേന്ദ്രൻ പറഞ്ഞു.