രാജ്യത്തെ ഞെട്ടിച്ച് ആകാശ ദുരന്തം! അട്ടിമറി സാധ്യതകൾ അന്വേഷിച്ച് രഹസ്യാന്വേഷണ ഏജൻസികൾ; പറന്നുയർന്നയുടൻ പൈലറ്റ് എയർ ട്രാഫിക് കോൺട്രോളിനെ അറിയിക്കാൻ ശ്രമിച്ചത് എന്ത് ?

അഹമ്മദാബാദ്: ലണ്ടനിലേക്ക് പുറപ്പെട്ട എയർഇന്ത്യാ വിമാനം അഹമ്മദാബാദിൽ തകർന്നുവീണ് 133 പേർ മരിച്ചതായി സൂചന. ടേക്ക് ഓഫ് ചെയ്‌ത്‌ അഞ്ചുമിനിട്ടിനുള്ളിൽ വിമാനത്താവളത്തിന് അടുത്തുള്ള പ്രദേശത്ത് ഒരു കെട്ടിട സമുച്ചയത്തിന് മുകളിൽ തകർന്നു വീഴുകയായിരുന്നു. എയർ ഇന്ത്യയുടെ എ ഐ 171 എന്ന വിമാനമാണ് അപകടത്തിൽപെട്ടത് 242 പേർ വിമാനത്തിലുണ്ടായിരുന്നു. ഇതിൽ 230 പേർ യാത്രികരും 12 പേർ ജീവനക്കാരുമാണ്. ബോയിങ് 787 ഡ്രീം ലൈനർ വിമാനമാണ് അപകടത്തിൽപ്പെട്ടത്. രക്ഷാപ്രവർത്തനം തുടരുന്നതിനാൽ മരണസംഖ്യ ഉയരാനുള്ള സാധ്യതയുമുണ്ട്.

പറന്നുയർന്ന് നിമിഷങ്ങൾക്കകം വിമാനം 165 അടി ഉയരത്തിലേക്ക് പതിക്കുകയായിരുന്നു. എഞ്ചിൻ തകരാറായിരിക്കാം അപകട കാരണം എന്നാണ് പ്രാഥമിക വിലയിരുത്തൽ. ഇന്ന് ഉച്ചയ്ക്ക് 1.38 ന് പറന്നുയർന്ന വിമാനം അടുത്ത നിമിഷം തകർന്ന് വീഴുകയായിരുന്നു. ആദ്യ നിമിഷം തന്നെ പൈലറ്റ് എയർ ട്രാഫിക് കോൺട്രോളിലേക്ക് വിളിച്ചു. എന്നാൽ അദ്ദേഹത്തിന് എന്തെങ്കിലും പറയുന്നതിന് മുമ്പ് വിമാനം അപകടത്തിൽപ്പെടുകയായിരുന്നു.

ഗുജറാത്ത് മുൻ മുഖ്യമന്ത്രി വിജയ് രൂപാണിയും വിമാനത്തിൽ ഉണ്ടായിരുന്നു. പന്ത്രണ്ടാം നമ്പർ സീറ്റിൽ അദ്ദേഹം ഉണ്ടായിരുന്നുവെന്നും അപകടത്തിന് ശേഷം ഗുരുതര പരിക്കുകളോടെ അദ്ദേഹത്തെ ആശുപത്രിയിൽ പ്രവേശിപ്പിച്ചിരിക്കുകയാണ്. ലണ്ടനിലേക്ക് പോകേണ്ട വിമാനത്തിന് മറ്റ് സ്റ്റോപ്പുകൾ ഉണ്ടായിരുന്നില്ല. അതുകൊണ്ടുതന്നെ വലിയ അളവിൽ ഇന്ധനം വിമാനത്തിൽ ഉണ്ടായിരുന്നു. ഇത് മരണസംഖ്യ ഉയരുന്നതിന് കാരണമായി എന്നാണ് വിലയിരുത്തൽ.