രാജ്യത്ത് നടപ്പിലാക്കുന്ന കേന്ദ്ര സർക്കാർ പദ്ധതികൾ ജില്ലകളിൽ എത്തുന്നുണ്ടോ? വിവിധ ജില്ലകളിലെ കളക്ടർമാരുമായി പ്രധാനമന്ത്രിയുടെ നേരിട്ടുള്ള സംവാദം ഇന്ന്

ദില്ലി: കേന്ദ്ര സർക്കാർ പദ്ധതികൾ ജില്ലകളിൽ നടപ്പിലാക്കുന്നതിനെക്കുറിച്ച് വിലയിരുത്താൻ രാജ്യത്തെ വിവിധ ജില്ലകളിലെ കളക്ടർമാരുമായി (Modi Meeting With District Collectors)പ്രധാനമന്ത്രി നരേന്ദ്ര മോദി ഇന്ന് സംവദിക്കും. ജില്ലകളിൽ നടപ്പിലാക്കുന്ന കേന്ദ്ര സർക്കാർ പദ്ധതികളുടെയും പരിപാടികളുടെയും നടത്തിപ്പിനെക്കുറിച്ച് യോഗത്തിൽ പ്രധാനമന്ത്രി നേരിട്ട് അഭിപ്രായം തേടും.രാവിലെ 11 മണിക്ക് വീഡിയോ കോൺഫറൻസ് വഴിയാണ് പരിപാടി നടക്കുക.

അതോടൊപ്പം രാജ്യത്ത് നടപ്പിലാക്കിയ വിവിധ പദ്ധതികളുടെ പുരോഗതിയെക്കുറിച്ചും അതിന്റെ നിലവിലെ അവസ്ഥയെക്കുറിച്ചും പ്രധാനമന്ത്രി യോഗത്തിൽ വിലയിരുത്തും. രാജ്യത്തെ ഒരു ഭാഗവും വികസന പാതയിൽ നിന്ന് വിട്ടുപോകുന്നില്ലെന്ന് ഉറപ്പാക്കാനുള്ള പ്രധാനമന്ത്രിയുടെ കാഴ്ചപ്പാടാണിത്. രാജ്യത്തുടനീളമുള്ള വളർച്ചയിലും വികസനത്തിലുമുള്ള അസമത്വത്തെ മറികടക്കാൻ പ്രധാനമന്ത്രി മോദിയുടെ നേതൃത്വത്തിൽ സർക്കാർ തുടർച്ചയായി നിരവധി നടപടികൾ കൈക്കൊണ്ടിട്ടുണ്ടെന്നും പ്രധാനമന്ത്രിയുടെ ഓഫീസ് പുറത്തിറക്കിയ പ്രസ്താവനയിൽ പറയുന്നു. അതേസമയം എല്ലാവരും ഒത്തുചേർന്ന് ജില്ലകളിലെ വിവിധ വകുപ്പുകളുടെ വിവിധ പദ്ധതികൾ പൂർത്തീകരിക്കുക എന്നതാണ് ഇതിലൂടെ പ്രധാനമന്ത്രി ലക്ഷ്യമിടുന്നത്.