ജല സംരക്ഷണത്തിന്റെ ആവശ്യകത ഓര്‍മ്മിപ്പിച്ച്‌ പ്രധാനമന്ത്രി; മലയാളിയായ ചായക്കടക്കാരനെ പുകഴ്ത്തി ആദ്യത്തെ മൻ കി ബാത്ത്

ദില്ലി: പ്രധാനമന്ത്രിയായി രണ്ടാമതും അധികാരം ഏറ്റെടുത്ത ശേഷം നടത്തിയ മൻ കി ബാത്തിൽ കേരളീയരായ ഒരു ചായക്കടക്കാരനെയും അധ്യാപകനെയും പുകഴ്ത്തി നരേന്ദ്ര മോദി. താന്‍ വായനയിലൂടെ കണ്ടെത്തിയ കേരളത്തിലെ ഒരു ലൈബ്രറിയെക്കുറിച്ചും അതിന്റെ നടത്തിപ്പുകാരില്‍ ഒരാളായ ചായക്കടക്കാരനെക്കുറിച്ചുമാണ് മോദിയുടെ പരാമര്‍ശം. ഇടുക്കിയില്‍, കൊടുംകാടിന്‌ നടക്കുള്ള ‘അക്ഷര’ എന്ന വായനശാലയെ കുറിച്ച്‌ തനിക്ക് ലഭിച്ച അറിവാണ് മോദി ജനങ്ങളുമായി പങ്കുവച്ചത്.

പി.വി ചിന്ന തമ്പി എന്ന ചായക്കടക്കാരനും. പി.കെ. മുരളീധരന്‍ എന്ന സ്‌കൂള്‍ അദ്ധ്യാപകനും ചേര്‍ന്നാണ് ഈ വായനശാല നടത്തുന്നതെന്നും ഏറെ കഷ്ടപ്പെട്ടാണ് ഈ സ്ഥാപനം ഇവര്‍ മുന്‍പോട്ട് കൊണ്ടുപോകുന്നതെന്നും മോദി പറയുന്നു. ഇവര്‍ പുസ്തകകെട്ടുകള്‍ ചുമലില്‍ ചുമന്ന് വായനശാലയിലേക്ക് എത്തിച്ച ഒരു കാലം ഉണ്ടായിരുന്നുവെന്നും ഏറെ നാള്‍ കഴിഞ്ഞ് ഇപ്പോള്‍ ഇവിടെയുള്ള ആദിവാസി കുട്ടികളെ ഈ വായനശാല പുതിയ പാതയിലേക്ക് നയിച്ചുവെന്നും മോദി ‘മന്‍ കി ബാത്തി’ലൂടെ പറഞ്ഞു.

രാജ്യത്തെ വരള്‍ച്ചയെക്കുറിച്ച്‌ ഉത്കണ്ഠ പ്രകടിപ്പിച്ച പ്രധാനമന്ത്രി വരള്‍ച്ച പ്രതിരോധിക്കാന്‍ ജലശേഖരണത്തിനുള്ള മാർഗങ്ങൾ തേടണമെന്നും ജനങ്ങളോട് പറഞ്ഞു. ശുചിത്വ മിഷന്‍ പോലെ ജല സംരക്ഷണവും ആരംഭിക്കേണ്ടതിന്‍റെ ആവശ്യകത പ്രതിമാസ റേഡിയോ പരിപാടിയില്‍ അദ്ദേഹം വിവരിച്ചു. മഴവെള്ള സംരക്ഷണത്തിനായി വിവിധ മേഖലകളില്‍ വ്യത്യസ്തമായ രീതികള്‍ അവലംബിക്കേണ്ടിവരും. പക്ഷേ ലക്ഷ്യം ഒന്നാണ്, ഓരോ തുള്ളി ജലവും സംരക്ഷിക്കുക.

ജല സംരക്ഷണത്തിന്‍റെ പാരമ്പര്യ രീതികള്‍ പങ്കുവെക്കാനും പ്രധാനമന്ത്രി ആഹ്വാനം ചെയ്തു. #JanShakti4JalShakti എന്ന ഹാഷ്ടാഗില്‍ ഇതുസംബന്ധിച്ച വിവരങ്ങള്‍ സോഷ്യല്‍ മീഡിയയില്‍ ചേര്‍ക്കാനും അദ്ദേഹം ആവശ്യപ്പെട്ടു. ലോക്സഭ തിരഞ്ഞെടുപ്പിനിടെ നടത്തിയ കേദര്‍നാഥ് യാത്രയെക്കുറിച്ചും പ്രധാനമന്ത്രി പരാമര്‍ശിച്ചു. കേദര്‍നാഥ് യാത്ര വ്യക്തിപരമായി ലഭിച്ച അവസരമായിരുന്നെന്നും അതില്‍ രാഷ്ട്രീയമില്ലെന്നും മോദി വ്യക്തമാക്കി. രണ്ടാമതും അധികാരമേറ്റ ശേഷമുള്ള ആദ്യ മന്‍ കി ബാത്ത് പ്രസംഗമാണ് പ്രധാനമന്ത്രി നടത്തിയത്.