ദേശീയ ചിഹ്നങ്ങളെ ബഹുമാനിക്കുന്നതിൽ നാം ശ്രദ്ധ കേന്ദ്രീകരിക്കും; കോവിഡിന്റെ പുതിയ തരംഗത്തോട് രാജ്യം വിജയകരമായി പൊരുതുന്നു; മൻകീ ബാത്തിൽ പ്രധാനമന്ത്രി

ദില്ലി: ദേശീയ ചിഹ്നങ്ങളെ ബഹുമാനിക്കുന്നതിൽ നാം ശ്രദ്ധ കേന്ദ്രീകരിക്കണമെന്ന് പ്രധാനമന്ത്രി (Narendra Modi) നരേന്ദ്ര മോദി.രാജ്യത്ത് കൊവിഡ് കേസുകള്‍ കുറയുന്നുണ്ടെന്നും വാക്സിനിലുള്ള വിശ്വാസം വര്‍ധിക്കുന്നത് പ്രത്യാശ നല്‍കുന്നതാണെന്നും പ്രധാനമന്ത്രി പറഞ്ഞു. ഈ വര്‍ഷത്തെ ആദ്യത്തെ മന്‍ കി ബാത്തില്‍ രാജ്യത്തെ ജനങ്ങളെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി.

രാജ്യത്തിന്റെ വിവിധ ഭാഗത്ത് നിന്നുള്ള ഒരു കോടിയോളം കുട്ടികള്‍ പോസ്റ്റ് കാര്‍ഡുകളിലൂടെ അവരുടെ മന്‍ കി ബാത്ത് ചിന്തകള്‍ എനിക്കയച്ചു. അവയില്‍ പലതും ഞാന്‍ വായിച്ചു. രാഷ്ട്രത്തിന്റെ ശോഭനമായ ഭാവിക്ക് ഇന്നത്തെ തലമുറയുടെ ചിന്തകള്‍ വളരെ പ്രധാനപ്പെട്ടതാണ്.

രാജ്യത്ത് പത്മ പുരസ്‌കാരങ്ങള്‍ പ്രഖ്യാപിക്കപ്പെട്ടു. അവരില്‍ ചില പേരുകള്‍ അധികം ആളുകള്‍ കേള്‍ക്കാത്തവയായിരിക്കും. സാധാരണ ജീവിത സാഹചര്യങ്ങളില്‍ അസാധാരണമായ നേട്ടങ്ങള്‍ കൈവരിച്ചവരാണ് അവര്‍. നമ്മള്‍ പാടിപ്പുകഴ്ത്താത്ത ഈ നാടിന്റെ നായകരാണവര്‍. ‘ഇത്തവണ പത്മ പുരസ്കാരം നേടിയവരിൽ പലരുടെയും പേര് നിങ്ങൾ കേട്ടുകാണില്ല. എന്നാൽ അവരെല്ലാം സാധാരണ ജീവിത സാഹചര്യങ്ങളിൽ അസാധാരണ നേട്ടം കൊയ്തവരാണ്. അവർ ആരും അറിയപ്പെടാത്ത നായകരാണ്.’–പ്രധാനമന്ത്രി കൂട്ടിച്ചേർത്തു.