ഷാങ്ഹായ് സഹകരണ ഉച്ചകോടിക്കിടെ മ്യാൻമർ സ്റ്റേറ്റ് സെക്യൂരിറ്റി ആൻഡ് പീസ് കമ്മീഷൻ ചെയർമാനുമായി കൂടിക്കാഴ്ച നടത്തി പ്രധാനമന്ത്രി നരേന്ദ്രമോദി ; സമാധാനപരമായ ജനാധിപത്യ പ്രക്രിയക്ക് പിന്തുണ നൽകുമെന്നും മോദി

ഷാങ്ഹായ് സഹകരണ ഉച്ചകോടിക്കിടെ പ്രധാനമന്ത്രി നരേന്ദ്രമോദി മ്യാൻമർ സ്റ്റേറ്റ് സെക്യൂരിറ്റി ആൻഡ് പീസ് കമ്മീഷൻ ചെയർമാൻ സീനിയർ ജനറൽ മിൻ ഓങ് ഹ്ലൈങ്ങുമായി കൂടിക്കാഴ്ച നടത്തി. ഭാരതത്തിന്റെ ‘നെബർഹുഡ് ഫസ്റ്റ്’, ‘ആക്ട് ഈസ്റ്റ്’, ‘ഇന്തോ-പസഫിക്’ നയങ്ങളിൽ മ്യാൻമറുമായുള്ള ബന്ധത്തിന് വലിയ പ്രാധാന്യമുണ്ടെന്ന് പ്രധാനമന്ത്രി ഈ കൂടിക്കാഴ്ചയിൽ വ്യക്തമാക്കി.

ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം മെച്ചപ്പെടുത്തുന്നത് സംബന്ധിച്ചും, വിവിധ മേഖലകളിലെ സഹകരണം സംബന്ധിച്ചും ഇരു നേതാക്കളും ചർച്ച ചെയ്തു. വികസന പങ്കാളിത്തം, പ്രതിരോധം, സുരക്ഷ, അതിർത്തി മാനേജ്‌മെന്റ്, അതിർത്തി കടന്നുള്ള വ്യാപാരം തുടങ്ങിയ വിഷയങ്ങളിൽ സഹകരണം ശക്തിപ്പെടുത്താൻ ധാരണയായി. പൂർത്തിയായിക്കൊണ്ടിരിക്കുന്ന കണക്ടിവിറ്റി പദ്ധതികൾ ഇരു രാജ്യങ്ങളിലെയും ജനങ്ങൾ തമ്മിലുള്ള ബന്ധം കൂടുതൽ ഊഷ്മളമാക്കുമെന്ന് പ്രധാനമന്ത്രി മോദി ചൂണ്ടിക്കാട്ടി. ഇത് ഭാരതത്തിന്റെ ‘ആക്ട് ഈസ്റ്റ്’ നയം ലക്ഷ്യമിടുന്ന പ്രാദേശിക സഹകരണത്തിനും സംയോജനത്തിനും വഴിയൊരുക്കുമെന്നും അദ്ദേഹം കൂട്ടിച്ചേർത്തു.

മ്യാൻമറിൽ നടക്കാനിരിക്കുന്ന തെരഞ്ഞെടുപ്പ് നീതിയുക്തവും എല്ലാ വിഭാഗങ്ങളെയും ഉൾക്കൊള്ളുന്നതും ആയിരിക്കുമെന്നാണ് പ്രതീക്ഷയെന്ന് പ്രധാനമന്ത്രി മോദി വ്യക്തമാക്കി. മ്യാൻമർ തന്നെ മുൻകൈയെടുക്കുന്ന സമാധാന പ്രക്രിയക്ക് ഭാരതം പിന്തുണ നൽകുമെന്നും സമാധാനപരമായ ചർച്ചകളും കൂടിയാലോചനകളും മാത്രമാണ് ഇതിനുള്ള ഏക വഴിയെന്നും മോദി ഊന്നിപ്പറഞ്ഞു. മ്യാൻമറിൻ്റെ വികസനാവശ്യങ്ങൾ നിറവേറ്റാൻ ഭാരതത്തിന്റെ എല്ലാ സഹായവും പ്രധാനമന്ത്രി വാഗ്ദാനം ചെയ്തു