ദില്ലി സ്ഫോടനത്തിൽ പരിക്കേറ്റവരെ ആശുപത്രിയിലെത്തി സന്ദർശിച്ച് പ്രധാനമന്ത്രി നരേന്ദ്രമോദി; ഭീകരർ വാങ്ങിയെന്ന് കരുതുന്ന ചുവന്ന എക്കോ സ്പോർട്ട് കാറിനായി വ്യാപക പരിശോധന

ദില്ലി സ്ഫോടനത്തിൽ പരിക്കേറ്റവരെ ആശുപത്രിയിലെത്തി സന്ദർശിച്ച് പ്രധാനമന്ത്രി നരേന്ദ്രമോദി. സ്ഫോടനത്തിന് പിന്നിൽ ​ഗൂഢാലോചന നടത്തിയവരെ നിയമത്തിന് മുന്നിൽ കൊണ്ടുവരുമെന്ന് അദ്ദേഹം ആവർത്തിച്ചു. സ്ഫോടനത്തിൻ്റെ പശ്ചാത്തലത്തിൽ പ്രധാനമന്ത്രിയുടെ അദ്ധ്യക്ഷതയിൽ സുരക്ഷാ കാര്യങ്ങൾക്കുള്ള ക്യാബിനറ്റ് സമിതി യോഗം ഇന്ന് വൈകുന്നേരം ചേരും

അതേസമയം, ദില്ലി ന​ഗരത്തിൽ ഉടനീളം ജാ​ഗ്രത നിർദേശം പുറപ്പെടുവിച്ചു. ചുവന്ന കളർ എക്കോ സ്പോർട്ട് കാർ കണ്ടുപിടിക്കാനാണ് ജാഗ്രത നിർദേശം നൽകിയിരിക്കുന്നത്. സ്‌ഫോടനത്തിൽ കൊല്ലപ്പെട്ട ഭീകരൻ ഉമർ ഉപയോഗിച്ച ഹ്യുണ്ടായി ഐ20ക്ക്‌ പുറമേ രണ്ട് കാറുകൾ കൂടി വാങ്ങിയതായാണ് സൂചന. വാഹനം കണ്ടെത്തുന്നതിനായി കർശന പരിശോധന ആരംഭിച്ചിട്ടുണ്ട്. അതിർത്തി ചെക്ക് പോസ്റ്റുകളിലും ജാഗ്രത നിർദേശമുണ്ട്. ഭീകരർക്ക് ലഭിച്ചത് 3,200 കിലോ സ്‌ഫോടകവസ്തുവാണെന്ന് കണ്ടെത്തിയിട്ടുണ്ട്. ഇതിൽ
ഇതുവരെ കണ്ടെത്താനായത് 2,900 കിലോ മാത്രമാണ്. ബാക്കി 300 കിലോ സ്ഫോടകവസ്തു ഈ ചുവന്ന എക്കോ സ്പോർട്ട് കാറിൽ ഉണ്ടാകാൻ സാധ്യതയുണ്ട്. ഉത്തർ പ്രദേശ്, ഹരിയാന പോലീസിനും ജാഗ്രത നിർദേശം നൽകിയിട്ടുണ്ട്. 5 പൊലീസ് സംഘങ്ങളാണ് ദില്ലിയിൽ വാഹനത്തിനായി തെരച്ചിൽ നടത്തുന്നത്.