വീണ്ടും പോലീസ് ആധിപത്യം: നടുറോഡിൽ യുവാവിനെക്കൊണ്ട് പാന്റ് തുടപ്പിച്ച് പൊലീസുകാരി; പിന്നാലെ കരണത്തടിയും; വൈറലായി വീഡിയോ

ഭോപാൽ: മദ്ധ്യപ്രദേശിലെ രേവയിൽ നടുറോഡിൽ വെച്ച് യുവാവിനെക്കൊണ്ട് യൂണിഫോം തുടപ്പിച്ച് പൊലീസുകാരി. ശശികല എന്ന കോണ്‍സറ്റബിളാണ് യുവാവിനെക്കൊണ്ട് പാന്റ് തുടപ്പിച്ചത്.

ബൈക്ക് പിന്നോട്ടെടുക്കുന്നതിനിടെ പാന്റില്‍ ചെളി തെറിപ്പിച്ചുവെന്നാണ് പൊലീസുകാരിയുടെ ആരോപണം. തുടർന്ന് യുവാവ് പൊലീസുകാരിയുടെ പാന്റ് തുടയ്ക്കുന്ന വീ‌ഡിയോ സമൂഹമാദ്ധ്യമങ്ങളിൽ വൈറലായിരുന്നു.

അതേസമയം ഉദ്യോഗസ്ഥ തൂവാല കൊണ്ട് മുഖം മറച്ചിരുന്നു. മാത്രമല്ല ചെളി തുടപ്പിച്ചതിനുശേഷം പൊലീസുകാരി യുവാവിന്റെ കരണത്തടിക്കുന്നതും ദൃശ്യങ്ങളിൽ വ്യക്തമാണ്.

സംഭവം വൈറലായതോടെ ഉന്നത ഉദ്യോഗസ്ഥർ രംഗത്ത് എത്തി. തങ്ങൾ വീഡിയോ കണ്ടുവെന്നും അതിലുള്ള ഉദ്യോഗസ്ഥയെ തിരിച്ചറിഞ്ഞുവെന്നും അഡീഷണൽ എസ് പി ശിവ്‌കുമാർ പറഞ്ഞു. ആരെങ്കിലും പരാതി നൽകുകയാണെങ്കിൽ സംഭവത്തിൽ അന്വേഷണം നടത്തുമെന്നും എസ് പി അറിയിച്ചു.