താവി നദിയില്‍ വെള്ളപ്പൊക്കത്തിന് സാധ്യത ! പാകിസ്ഥാന് ഭാരതത്തിന്റെ മുന്നറിയിപ്പ് ! നടപടി മാനുഷിക പരിഗണനയുടെ അടിസ്ഥാനത്തിലെന്ന് ജല ശക്തി മന്ത്രാലയം

ദില്ലി: താവി നദിയിലെ വെള്ളപ്പൊക്ക സാധ്യതയെക്കുറിച്ച് പാകിസ്ഥാന് മുന്നറിയിപ്പ് നൽകി ഭാരതം. സിന്ധു നദീജല കരാറിൽ നിന്ന് പിന്മാറിയതിന് ശേഷം ആദ്യമായാണ് ഇത്തരത്തിലൊരു മുന്നറിയിപ്പ് ഭാരതം പാകിസ്ഥാന് നൽകുന്നത്. മാനുഷിക പരിഗണനയുടെ അടിസ്ഥാനത്തിലാണ് ഈ നടപടിയെന്ന് കേന്ദ്ര ജലശക്തി മന്ത്രാലയം അറിയിച്ചു. നദിയിലെ ജലനിരപ്പ് ഉയരാൻ സാധ്യതയുണ്ടെന്നും ഇത് പാകിസ്ഥാനിലെ പഞ്ചാബ്, സിയാൽകോട്ട് മേഖലകളിൽ കനത്ത നാശനഷ്ടങ്ങൾക്ക് ഇടയാക്കുമെന്നും മന്ത്രാലയം വ്യക്തമാക്കി. വിദേശകാര്യ മന്ത്രാലയവുമായി വിശദമായ കൂടിയാലോചനകൾ നടത്തിയ ശേഷമാണ് മുന്നറിയിപ്പ് നൽകാനുള്ള തീരുമാനമെടുത്തതെന്നും മന്ത്രാലയ വൃത്തങ്ങൾ അറിയിച്ചു.

ഹിമാലയത്തിൽ നിന്ന് ഉത്ഭവിച്ച് ജമ്മു ഡിവിഷനിലൂടെ ഒഴുകി പാകിസ്ഥാനിലെ ചെനാബ് നദിയിൽ ചേരുന്ന പ്രധാനപ്പെട്ട പോഷകനദിയാണ് താവി. പഹൽഗാം ഭീകരാക്രമണത്തിന് പിന്നാലെ, പതിറ്റാണ്ടുകൾ പഴക്കമുള്ള സിന്ധു നദീജല കരാർ ഭാരതം മരവിപ്പിച്ചിരുന്നു. “വെള്ളവും രക്തവും ഒരുമിച്ച് ഒഴുകില്ല” എന്ന ശക്തമായ നിലപാടോടെയാണ് ഭാരതം ഈ തീരുമാനമെടുത്തത്. 1960-ൽ ലോകബാങ്കിന്റെ മധ്യസ്ഥതയിൽ ഇന്ത്യയും പാകിസ്ഥാനും ഒപ്പുവെച്ച ഈ കരാർ, സിന്ധു നദിയുടെയും അതിന്റെ പോഷകനദികളുടെയും ജലവിതരണം സംബന്ധിച്ച തർക്കങ്ങൾ പരിഹരിക്കുന്നതിനുള്ള പ്രധാന രേഖയായിരുന്നു.