ശ്വാസതടസ്സ രോഗങ്ങൾക്ക് “പ്രാണായാമം”; ശ്രദ്ധേയമായി ഡോ.കെ. വേണുഗോപാലിന്റെ പഠനം

ആലപ്പുഴ: പ്രാണായാമം (pranayama) ശ്വാസതടസ്സ രോഗികൾക്ക് പ്രയോജനകരമെന്ന് പഠനം. ആലപ്പുഴ ജനറൽ ആശുപത്രി ശ്വാസകോശ വിഭാഗം മേധാവിയും ആരോഗ്യ വകുപ്പ് ചീഫ് കൺസൾട്ടന്റുമായ ഡോ.കെ. വേണുഗോപാൽ അറുപതോളം രോഗികളിൽ നടത്തിയ പഠനഫലത്തിലാണ് നിർണ്ണായക കണ്ടെത്തൽ. ഈ പഠനഫലം അമേരിക്കൻ കോളേജ് ഓഫ് ചെസ്റ്റ് ഫിസിഷ്യൻസിന്റെ അന്താരാഷ്ട്ര വാർഷിക സമ്മേളനത്തിൽ അവതരിപ്പിക്കാൻ അവസരം ലഭിച്ചിരിക്കുകയാണ്.

ശ്വാസതടസ്സ രോഗികളെ മൂന്നായി തിരിച്ച് ഒരു വിഭാഗത്തിന് സാധാരണ ചികിത്സയും മറ്റൊന്നിന് വ്യായാമമുറയായ ഡയഫ്രമാറ്റിക് ബ്രീത്തിങ്ങും, മറ്റുള്ളവർക്ക് പ്രാണായാമവും നൽകിയശേഷമാണ് പഠനം ഡോക്ടർ പഠനം നടത്തിയത്. ഇതിൽ പ്രാണായാമം മറ്റു ചികിത്സയോടൊപ്പം നേടിയവർക്ക് മറ്റ് രണ്ട് വിഭാഗങ്ങളെക്കാൾ മേന്മയുള്ളതായാണ് കണ്ടെത്തൽ.

ആറുമാസത്തോളം നടത്തിയ ഗവേഷണത്തിൽ ഫിസിയോതെറാപ്പിസ്റ്റ് അനുജ, ഡോക്ടർ ശ്രീലത, ഡോക്ടർ നിഷ എന്നിവരും പങ്കാളികളായിരുന്നു. ഗവേഷണഫലം അന്താരാഷ്ട്രതലത്തിൽ പ്രസിദ്ധമായ ചെസ്റ്റ് ജേണലിൽ പ്രസിദ്ധീകരിക്കും. ഇറ്റലിയിലെ ബോളോണയിൽ അടുത്ത ഫെബ്രുവരി മൂന്നു മുതൽ അഞ്ചു വരെ നടക്കുന്ന അന്താരാഷ്ട്ര സമ്മേളനത്തിലാണ് പ്രബന്ധം അവതരിപ്പിക്കുന്നത്. രണ്ടു വർഷങ്ങൾക്കു ശേഷം ആദ്യമായാണ് അമേരിക്കൻ യൂറോപ്യൻ മേഖലയിൽ ഭൗതിക സമ്മേളനം നടക്കുന്നത്.