സൈനിക ബഹുമതികള്‍ പ്രഖ്യാപിച്ച് രാഷ്‌ട്രപതി ; അനന്ദ്നാഗിൽ വീരമൃത്യു വരിച്ച മൻപ്രീത് സിങ് ഉള്‍പ്പെടെ 4 പേര്‍ക്ക് കീര്‍ത്തിചക്ര

ദില്ലി : സ്വാതന്ത്രദിനത്തോട് അനുബന്ധിച്ചുള്ള സൈനിക ബഹുമതികൾ പ്രഖ്യാപിച്ച് രാഷ്ട്രപതി ദ്രൗപതി മുർമു . കശ്മീരിലെ അനന്ദ്നാഗിൽ ഭീകരരുമായുണ്ടായ ഏറ്റുമുട്ടലിൽ വീരമൃത്യു വരിച്ച കേണൽ മൻപ്രീത് സിങ്ങ് അടക്കം നാല് പേരെ രാജ്യത്തെ രണ്ടാമത്തെ പരമോന്നത ബഹുമതിയായ കീർത്തിചക്ര നൽകി ആദരിക്കും. കേണൽ മൻപ്രീത് സിങ്ങിന് മരണാനന്തര ബഹുമതിയായാണ് കീർത്തി ചക്ര നൽകുക.

2023 സെപ്റ്റംബർ 13ലുണ്ടായ ഭീകരാക്രമണത്തിലാണ് മൻപ്രീത് സിങ്ങിന് ജീവൻ നഷ്ടമായത്. കേണൽ മൻപ്രീത് സിങ്, മേജർ ആശിഷ് ധോൻചക്, ഹുമയൂൺ ഭട്ട്, സിപോയ് പർദീപ് സിങ് എന്നിവരാണ് അനന്ദ്നാഗിലെ ഭീകരാക്രമണത്തിൽ കൊല്ലപ്പെട്ടത്.17 വർഷത്തോളം സൈന്യത്തിൽ സേവനമനുഷ്‌ഠിച്ചിട്ടുണ്ട് കേണൽ മൻപ്രീത്. ഭീകരാക്രമണ സമയത്ത് രാഷ്ട്രീയ റൈഫിൾസ് 19ന്‍റെ ഭാഗമായിരുന്നു മൻപ്രീത് സിങ്. ആർആർലെ കാലാവധി പൂർത്തിയാക്കാൻ നാല് മാസം മാത്രം ശേഷിക്കേയാണ് ഭീകരാക്രമണത്തില്‍ മൻപ്രീത് സിങിന്‍റെ ജീവന്‍ നഷ്‌ടപ്പെടുന്നത്.

പഞ്ചാബിലെ ഭരോൻജിയാനിലാണ് കേണൽ മൻപ്രീതിൻ്റെ കുടുംബം. ഭാര്യ ജഗ്മീത് ഗ്രെവാളും രണ്ട് മക്കളും അടങ്ങുന്നതാണ് മന്‍പ്രീത് സിങ്ങിന്‍റെ കുടുംബം. റൈഫിൾമാൻ രവി കുമാർ, മേജർ എം നായിഡു എന്നിവരുൾപ്പെടെ നാല് സൈനികർക്കാണ് കീർത്തി ചക്ര ലഭിച്ചത്. ദീപക് കുമാറിന് ശൗര്യചക്ര പുരസ്‌കാരവും ലഭിച്ചു.