ഇന്ത്യയുമായുള്ള വ്യാപാര ബന്ധം നിർത്തലാക്കിയ പാകിസ്ഥാന് തിരിച്ചടി : ഭക്ഷ്യവസ്തുക്കൾക്ക് തീ വില : ഇമ്രാനെ ശപിച്ച് സാധാരണക്കാർ

ഇസ്ലാമാബാദ്: ഇന്ത്യയുമായുള്ള വ്യാപാര ബന്ധം നിർത്തലാക്കിയതിനുപിന്നാലെ പാകിസ്ഥാനിൽ ഭക്ഷ്യവസ്തുക്കൾക്ക് വില കുതിച്ചുയരുന്നു. ഈദ് ആഘോഷം അടുത്തിരിക്കുന്ന വേളയിൽ പാകിസ്ഥാന് വൻ തലവേദനയാണ് ഈ വിലക്കയറ്റം. വിലക്കയറ്റം ഈദ് ആഘോഷങ്ങളെ അലങ്കോലമാക്കുമെന്ന പേടിയിലാണ് പാകിസ്ഥാനിലെ സാധാരണക്കാർ.

ഈദ് ആഘോഷത്തിനുപിന്നാലെ പാകിസ്ഥാനിൽ വിവാഹ സീസൺ തുടങ്ങുകയാണ്. ഈ സാഹചര്യത്തിൽ പാകിസ്ഥാൻ കടുത്ത സാമ്പത്തിക്ക പ്രതിസന്ധി നേരിടേണ്ടി വരുമെന്ന് ബാങ്കിംഗ് മേഖലയും ആശങ്കപ്പെടുന്നു.

ഇന്ത്യയിൽ നിന്നുള്ള ഭക്ഷ്യവസ്തുക്കളുടെ വരവ് നിലച്ചതോടെ പാകിസ്താനിലെ കുടുംബ ബജറ്റുകൾ താളം തെറ്റിയ നിലയിലാണ്. പാൽ, പച്ചക്കറികൾ, ഇറച്ചി എന്നിവയ്ക്ക് വിപണിയിൽ വൻ വിലക്കയറ്റമാണ് ഉണ്ടായിരിക്കുന്നത്.

പച്ചക്കറികൾക്കും ഉള്ളിക്കും മറ്റും പാക്ക് വ്യാപാരികൾ ആശ്രയിച്ചിരുന്നത് ഇന്ത്യയെയാണ്. ഈദ് ആഘോഷ വേളയിൽ പച്ചക്കറിയുടെയും ഉള്ളിയുടെയും ദൗർലഭ്യം ഇമ്രാൻ ഖാൻ എങ്ങനെ പരിഹരിക്കാനാണ് ഉദ്ദേശിക്കുന്നതെന്ന് വ്യാപാരികൾ ചോദിക്കുന്നു. രാഷ്ട്രീയ വിഷയങ്ങൾ അന്നം മുട്ടിച്ചതിൽ കടുത്ത പ്രതിഷേധത്തിലാണ് പാകിസ്ഥാനിലെ ജനങ്ങൾ.