പ്രധാനമന്ത്രി നരേന്ദ്രമോദി വാരണാസിയുടെ മുഖച്ഛായ മാറ്റിമറിച്ചു; പ്രശംസയുമായി താരം രൺവീർ സിംഗ്

ലക്‌നൗ: വാരാണസിയുടെ വികസനത്തിലും മാറ്റത്തിനും പിന്നിൽ പ്രധാനമന്ത്രി നരേന്ദ്രമോദിയെന്ന് ബോളിവുഡ് താരം രൺവീർ സിംഗ്. വാരണാസിയിലെ നെയ്‌ത്തുകാരെ സംരക്ഷിക്കുന്നതിനും പ്രോത്സാഹിപ്പിക്കുന്നതിനുമായി പ്രധാനമന്ത്രി നടത്തിയ ശ്രമങ്ങൾ അഭിനന്ദനാർഹമാണ്. കഴിഞ്ഞ 10 വർഷത്തിനിടെ അദ്ദേഹം വാരാണസിയുടെ മുഖച്ഛായ മാറ്റിമറിച്ചു എന്ന് രൺവീർ സിംഗ് പറഞ്ഞു. പ്രശസ്ത ഡിസൈനർ മനീഷ് മൽഹോത്രയുടെ ഫാഷൻ ഷോയുടെ ഭാഗമായാണ് രൺവീറും ബോളിവുഡ് സുന്ദരി കൃതി സനോണും കഴിഞ്ഞ ദിവസം വാരാണസിയിലെത്തിയത്.

‘വാരാണസിയിലെ നെയ്‌ത്തുകാരെ സംരക്ഷിക്കുന്നതിനും പ്രോത്സാഹിപ്പിക്കുന്നതിനുമായി പ്രധാനമന്ത്രി നരേന്ദ്രമോദി നടത്തിയ ശ്രമങ്ങൾ അഭിനന്ദനാർഹമാണ്. നമ്മുടെ രാജ്യത്തിന്റെ സമ്പന്നമായ സാംസ്‌കാരിക പൈതൃകത്തിൽ അഭിമാനിക്കേണ്ടത് വളരെയധികം പ്രധാനപ്പെട്ട കാര്യമാണ്. രാജ്യത്തിന്റെ ഭാവി യുവാക്കളുടെ കൈയ്യിലാണ്‌. അതുകൊണ്ട് നെയ്‌ത്ത് വ്യവസായത്തെ പ്രോത്സാഹിപ്പിക്കേണ്ട നിങ്ങളുടെ ഉത്തരവാദിത്തം കാണാതെ പോകരുതെന്നും’ രൺവീർ പറഞ്ഞു. നമ്മുടെ പൈതൃകത്തിന്റേയും സംസ്‌കാരത്തിന്റേയും പ്രതീകമായ കൈത്തറി വസ്ത്രങ്ങൾ ധരിക്കാൻ താൻ എപ്പോഴും ആഗ്രഹിച്ചിരുന്നതായി കൃതിയും വ്യക്തമാക്കി.