വയനാട്ടില്‍ രാഹുല്‍ ഗാന്ധി ജയിക്കാന്‍ കാരണം മുസ്ലിം വോട്ടിന്റെ ഏകീകരണം: വര്‍ഗീയ പരാമര്‍ശവുമായി ഒവൈസി

ഹൈദരാബാദ്: വയനാട്ടിലെ രാഹുല്‍ ഗാന്ധിയുടെ വിജയം സംബന്ധിച്ച് വര്‍ഗീയ പരാമര്‍ശം നടത്തിയ ആള്‍ ഇന്ത്യ മജ്‌ലിസ്-ഇ- ഇത്തിഹാദുല്‍ മുസ്ലീമിന്‍ പ്രസിഡന്റ് അസാദുദ്ദീന്‍ ഒവൈസിയ്ക്കെതിരെ പ്രതിഷേധം ശക്തമാകുന്നു. കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധി വയനാട് മണ്ഡലത്തില്‍ ജയിക്കാന്‍ കാരണം അവിടെ 40 ശതമാനം പേരും മുസ്ലീമായത് കൊണ്ടാണെന്നാണ് ഒവൈസിയുടെ പരാമര്‍ശം.
എന്നാല്‍ 29 ശതമാനം മുസ്‌ലിങ്ങളുടെ വോട്ട് ഏകീകരിച്ചതാണ് രാഹുലിന്റെ വിജയത്തിനുകാരണമായതെന്നാണ് പൊതു വിശകലനം

‘കോണ്‍ഗ്രസ് അദ്ധ്യക്ഷന്‍(രാഹുല്‍ ഗാന്ധി)അമേതിയില്‍ തോറ്റു,വയനാട്ടില്‍ വിജയിച്ചു. വയനാട്ടില്‍ 40ശതമാനം മുസ്ലീം ജനതയല്ലേ? എന്നായിരുന്നു ഞായറാഴ്ച ഹൈദരാബാദിലെ ഒരു പൊതുപരിപാടിക്കിടെ ഒവൈസി ചോദിച്ചത്.

1947ആഗസ്ത് 15ന് നമ്മുടെ പൂര്‍വികര്‍ വിചാരിച്ചത് ഇതാണ് പുതിയ ഇന്ത്യ എന്നായിരുന്നു.ആ ഇന്ത്യ ആസാദിന്റെയും, ഗാന്ധിയുടെയും,നെഹ്‌റുവിന്റെയും അംബേദ്ക്കറിന്റെയും അവരുടെ കോടിക്കണക്കിന് അനുയായികളുടെയുമായിരുന്നു. ഞാന്‍ ഇപ്പോഴും പ്രതീക്ഷിക്കുന്നു രാജ്യത്ത് നമ്മള്‍ നമ്മുടെ സ്ഥാനം നേടും.

നമുക്ക് അതിജീവിക്കാന്‍ ആരുടെയും ഭിക്ഷ ആവശ്യമില്ല. നിങ്ങള്‍ കോണ്‍ഗ്രസോ മറ്റ് മതേതര പാര്‍ട്ടികളോ ഉപേക്ഷിക്കണ്ട, പക്ഷേ ഒരു കാര്യം ചിന്തിക്കൂ അവര്‍ക്ക് ശക്തി ഇല്ല,അവര്‍ കഠിനാധ്വാനം ചെയ്യുന്നില്ല. പഞ്ചാബ് ബിജെപിക്ക് നഷ്ടപ്പെട്ടു.അവിടെ ആരാണ്? സിക്ക്. കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധി അമേതിയില്‍ പരാജയപ്പെട്ടു. വയനാട്ടില്‍ ജയിച്ചു. അവിടെ 40 ശതമാനം മുസ്ലീം ജനതയല്ലേ? ‘- ഒവൈസി പറഞ്ഞു.

വയനാട്ടില്‍ എതിര്‍സ്ഥാനാര്‍ത്ഥി പി.പി സുനീറിനെക്കാള്‍ 4,31,063 വോട്ടുകള്‍ക്കാണ് രാഹുല്‍ ഗാന്ധി വിജയിച്ചത്. എന്നാല്‍ ഉത്തര്‍പ്രദേശിലെ അമേതിയില്‍ സ്മൃതി ഇറാനി രാഹുല്‍ ഗാന്ധിയെ പരാജയപ്പെടുത്തിയിരുന്നു.