രാഹുൽ തിളങ്ങി;ഓസ്ട്രേലിയയ്ക്കെതിരായ ഏകദിന പരമ്പരയിൽ ഇന്ത്യയ്ക്ക് വിജയത്തുടക്കം

മുംബൈ : ഓസ്‌ട്രേലിയക്കെതിരായ ഏകദിന പരമ്പരയിൽ ഇന്ത്യയ്ക്ക് വിജയത്തുടക്കം. ആവേശകരമായ മുംബൈയിലെ വാങ്കെഡെ സ്റ്റേഡിയത്തിൽ നടന്ന ആദ്യ മത്സരത്തിൽ അഞ്ച് വിക്കറ്റിനാണ് ഇന്ത്യ വിജയിച്ചത്. ടോസ് നേടിയ ഇന്ത്യ ഓസ്‌ടേലിയയെ ബാറ്റിങ്ങിന് അയക്കുകയായിരുന്നു. മികച്ച തുടക്കം കിട്ടിയിട്ടും മുതലാക്കാനാവാതെ പോയ കങ്കാരുക്കൾ 35.4 ഓവറിൽ 188 റൺസിന് കൂടാരം കയറി. മറുപടി ബാറ്റിങ്ങിൽ 39.5 ഓവറിൽ അഞ്ച് വിക്കറ്റും നഷ്ടത്തിൽ ഇന്ത്യ വിജയത്തിലെത്തി. ഇതോടെ, മൂന്നു മത്സരങ്ങൾ ഉൾപ്പെടുന്ന പരമ്പരയിൽ ഇന്ത്യ 1–0ന് മുന്നിലെത്തി. രണ്ടാം മത്സരം ഞായറാഴ്ച വിശാഖപട്ടണത്ത് നടക്കും.

നാലു വിക്കറ്റ് നഷ്ടത്തിൽ 39 റൺസെന്ന നിലയിൽ പരുങ്ങിയ ഇന്ത്യയ്ക്ക് ആറാം വിക്കറ്റിൽ രവീന്ദ്ര ജഡേജയ്‌ക്കൊപ്പം രാഹുൽ പടുത്തുയർത്തിയ സെഞ്ചറി കൂട്ടുകെട്ടാണ് നിർണായകമായത് . 123 പന്തുകൾ നേരിട്ട ഇരുവരും അടിച്ചുകൂട്ടിയത് 108 റൺസാണ്.91 പന്തുകളിൽ നിന്ന് ഏഴു ഫോറും ഒരു സിക്സും സഹിതമാണ് രാഹുൽ 75 റൺസെടുത്തത്. ജഡേജ 69 പന്തിൽ അഞ്ച് ഫോറുകൾ സഹിതം 36 റൺസെടുത്തു.

ക്യാപ്റ്റൻ ഹാർദിക് പാണ്ഡ്യ 31 പന്തിൽ മൂന്നു ഫോറും ഒരു സിക്സും സഹിതം 25 റൺസെടുത്ത് പുറത്തായി.ശുഭ്മൻ ഗിൽ 31 പന്തിൽ മൂന്നു ഫോറുകളോടെ 20 റൺസെടുത്ത് പുറത്തായി.

അതേസമയം, മുൻ നായകൻ വിരാട് കോലി (ഒൻപത് പന്തിൽ നാല്), ഓപ്പണർ ഇഷാൻ കിഷൻ (എട്ടു പന്തിൽ മൂന്ന്), ടി20 സ്പെഷ്യലിസ്റ്റ് ബാറ്റർ സൂര്യകുമാർ യാദവ് (0) എന്നിവർ നിരാശപ്പെടുത്തി. ഓസീസിനായി സ്റ്റാർക്ക് മൂന്നു വിക്കറ്റും മാർക്കസ് സ്റ്റോയ്നിസ് രണ്ടു വിക്കറ്റും വീഴ്ത്തി.