മുതിർന്ന നേതാക്കൾ തമ്മിലടിക്കുമോ?? കോൺഗ്രസ് അദ്ധ്യക്ഷ തിരഞ്ഞെടുപ്പ് പ്രക്രിയയിൽ ആശങ്ക പ്രകടിപ്പിച്ച് അഞ്ച് കോൺഗ്രസ് എംപിമാർ

ദില്ലി: കോൺഗ്രസ് അദ്ധ്യക്ഷ സ്ഥാനത്തേക്കുള്ള തെരഞ്ഞെടുപ്പ് പ്രക്രിയയിൽ ആശങ്കയുണ്ടെന്ന് കോൺഗ്രസ് എം പിമാർ. ഇത് ചൂണ്ടിക്കാട്ടി കോൺഗ്രസിന്റെ അഞ്ച് ലോക്‌സഭാ എംപിമാർ കോൺഗ്രസ് സെൻട്രൽ ഇലക്ഷൻ അതോറിറ്റി ചെയർമാൻ മധുസൂദനൻ മിസ്ത്രിക്ക് സംയുക്തമായി കത്തയച്ചു.

ശശി തരൂർ, മനീഷ് തിവാരി, കാർത്തി ചിദംബരം, പ്രദ്യുത് ബോർഡ്‌ലോയ്, അബ്ദുൾ ഖാലിഖ് എന്നിവരാണ് കത്ത് അയച്ചത്. വോട്ടർപട്ടിക പുറത്തുവിടണമെന്ന തങ്ങളുടെ ആവശ്യത്തിന് തെറ്റായ വ്യാഖ്യാനം നൽകുന്നത് നിർഭാഗ്യകരമാണെന്ന് ഇവർ കത്തിൽ ചൂണ്ടിക്കാട്ടിയിട്ടുണ്ട്. ഇലക്ടറൽ കോളേജ് ഉൾപ്പെടുന്ന പ്രദേശ് കോൺഗ്രസ് കമ്മിറ്റി പ്രതിനിധികളുടെ ലിസ്റ്റ് നൽകണമെന്നും കത്തിൽ പറയുന്നുണ്ട്. പാർട്ടിയുടെ അദ്ധ്യക്ഷ തിരഞ്ഞെടുപ്പ് പ്രക്രിയയുടെ സുതാര്യതയിലും നീതിയിലും ആശങ്കാകുലരാണ് എന്ന് ഇവർ പറയുന്നുണ്ട്.

അദ്ധ്യക്ഷ തിരഞ്ഞെടുപ്പ് പാർട്ടിയുടെ ആഭ്യന്തര കാര്യമാണെന്നും എതിരാളികൾ വോട്ടർ പട്ടിക ദുരുപയോഗം ചെയ്യാമെന്നും വാദിച്ച് മുൻഗണനയില്ലാത്തതിനാൽ പട്ടിക പൊതുമദ്ധ്യത്തിൽ സ്ഥാപിക്കാൻ കഴിയില്ലെന്ന് മധുസൂദനൻ മിസ്ത്രി നേരത്തെ വ്യക്തമാക്കിയിരുന്നു. എന്നാൽ മിസ്ത്രിയുടെ വാദങ്ങളെ തള്ളിക്കൊണ്ടാണ് എം പിമാരുടെ ഈ കത്ത്.

തിരഞ്ഞെടുപ്പ് പട്ടിക പുറത്തുവിടണമെന്ന ഞങ്ങളുടെ ആവശ്യത്തിന് തെറ്റായ വ്യാഖ്യാനം നൽകുന്നത് നിർഭാഗ്യകരമാണ്. പാർട്ടിയുടെ ഏതെങ്കിലും ആഭ്യന്തര രേഖ പുറത്തുവിടണമെന്ന് ഞങ്ങൾ നിർദ്ദേശിക്കുന്നില്ല, എന്നാണ് കത്തിൽ പറയുന്നത്.