ഐഎസിന്റെ ഇന്ത്യൻ സെല്ലിലേക്ക് യുവാക്കളെ റിക്രൂട്ട്‌മെന്റ് നടത്തുന്നതലവൻ അഹമ്മദ് അഹൻഘറിനെ ഭീകരനായി പ്രഖ്യാപിച്ച് കേന്ദ്രം

ശ്രീനഗർ: ആഗോള ഭീകര സംഘടനയായ ഐഎസിന്റെ ഇന്ത്യൻ സെല്ലിലേക്ക് യുവാക്കളെ റിക്രൂട്ട്‌മെന്റ് നടത്തുന്ന തലവൻ അബ്ദു അൽ-കശ്മീരി എന്നപേരിൽ കുപ്രസിദ്ധി നേടിയ അഹമ്മദ് അഹൻഘറിനെ കേന്ദ്രസർക്കാർ ഭീകരനായി പ്രഖ്യാപിച്ചു. 1967-ലെ നിയമവിരുദ്ധ പ്രവർത്തനം തടയൽ നിയമപ്രകാരമാണ് അഹമ്മദ് അഹൻഘറിനെ കേന്ദ്രം ഭീകരനായി പ്രഖ്യാപിച്ചത്. ജമ്മു കശ്മീരിൽ ഐഎസിന്റെ റിക്രൂട്ട്‌മെന്റ് നടത്തുന്നത് ഇയാളാണെന്ന് നേരത്തെ വ്യക്തമായിരുന്നു. ജമ്മു കശ്മീർ സ്വദേശിയായ അഹൻഘർ ഇപ്പോൾ അഫ്ഗാൻ കേന്ദ്രമാക്കിയാണ് പ്രവർത്തിക്കുന്നത്.

നിരോധിത ഭീകര സംഘടനയായ അൽഖ്വയ്ദയുടെയും മറ്റ് തീവ്രവാദ ഗ്രൂപ്പുകളുടെയും പ്രവർത്തനങ്ങളുടെ ഏകോപന ചുമതല അഹൻഘറായിരുന്നു. ഇതിനു ശേഷമാണ് ഇയാൾ ഐഎസിന്റെ റിക്രൂട്ട്‌മെന്റ് നടപടികൾ ജമ്മു കശ്മീരിൽ ആരംഭിച്ചതെന്ന് കേന്ദ്ര ആഭ്യന്തര മന്ത്രാലയം അറിയിച്ചു . ഇന്ത്യ കേന്ദ്രീകരിച്ച് ഐഎസ് മാഗസിൻ ആരംഭിക്കുന്നതിൽ നിർണായക പങ്ക് വഹിച്ചതായും മന്ത്രാലയത്തിന്റെ പ്രസ്താവനയിൽ പറയുന്നു. രാജ്യസുരക്ഷയ്‌ക്ക് ഭീഷണി ഉണ്ടാക്കും വിധം പ്രവർത്തനങ്ങളിലേർപ്പെടുന്നതായും കണ്ടെത്തി. തുടർന്നാണ് ആഭ്യന്തര മന്ത്രാലയം കൊടും ഭീകരനായി പ്രഖ്യാപിച്ചത്.