ഉദയനിധി സ്റ്റാലിന് ആശ്വാസം! റിമാൻഡ് ചെയ്യേണ്ടതില്ലെന്ന് സർക്കാർ; വിട്ടയക്കാൻ കോടതി ഉത്തരവ്

ചെന്നൈ : നടി തൃഷയ്‌ക്കെതിരായ അധിക്ഷേപ പരാമർശ കേസിൽ അറസ്റ്റിലായ ഡി.എം.കെ. നേതാവ് ഉദയനിധി സ്റ്റാലിനെ വിട്ടയക്കാൻ കോടതി ഉത്തരവിട്ടു. ഉദയനിധിയെ റിമാൻഡ് ചെയ്യേണ്ടതില്ലെന്നും ചോദ്യം ചെയ്യലിന്റെ ഭാഗമായാണ് കസ്റ്റഡിയിലെടുത്തതെന്നും തമിഴ്‌നാട് സർക്കാർ അഡ്വക്കേറ്റ് ജനറൽ വഴി കോടതിയെ അറിയിച്ചു. സ്റ്റേഷൻ ജാമ്യത്തിൽ വിട്ടയക്കാൻ തയ്യാറാണെന്ന സർക്കാരിന്റെ നിലപാട് രേഖപ്പെടുത്തിയ കോടതി, അദ്ദേഹത്തെ ഇന്ന് തന്നെ വിട്ടയക്കാൻ നിർദ്ദേശിക്കുകയായിരുന്നു. തുടർന്നുള്ള അന്വേഷണവുമായി പൂർണ്ണമായി സഹകരിക്കണമെന്നും കോടതി വ്യക്തമാക്കിയിട്ടുണ്ട്.

ചെന്നൈ നീലാങ്കരയിലെ വീട്ടിൽ നിന്നാണ് തഞ്ചാവൂർ പോലീസ് ഉദയനിധിയെ കസ്റ്റഡിയിലെടുത്തത്. ഉച്ചയ്ക്ക് 12 മണി വരെ നടപടികൾ പാടില്ലെന്ന മദ്രാസ് ഹൈക്കോടതിയുടെ നിർദ്ദേശം നിലനിൽക്കെയാണ് പോലീസ് കസ്റ്റഡിയിലെടുത്തതെന്ന് ഡി.എം.കെ. ആരോപിക്കുന്നു. അതേസമയം താൻ ആർക്കെതിരെയും മോശം പരാമർശം നടത്തിയിട്ടില്ലെന്നും വിജയിയെയോ തൃഷയെയോ കുറിച്ച് പ്രസംഗത്തിൽ പരാമർശിച്ചിട്ടില്ലെന്നുമാണ് ഉദയനിധിയുടെ പ്രതികരണം.

നാളെ ബജറ്റ് സമ്മേളനം ചേരാനിരിക്കെ ഉദയനിധിയെ നിയമസഭയിൽ നിന്ന് മാറ്റിനിർത്താനുള്ള രാഷ്ട്രീയ ഗൂഢാലോചനയാണ് അറസ്റ്റിന് പിന്നിലെന്ന് ഡി.എം.കെ. കുറ്റപ്പെടുത്തി. അറസ്റ്റിന് പിന്നാലെ തമിഴ്‌നാട്ടിൽ വ്യാപക പ്രതിഷേധമാണ് അരങ്ങേറുന്നത്. പോലീസിനെ തടഞ്ഞും തെരുവിൽ ഇറങ്ങിയും ഡി.എം.കെ. പ്രവർത്തകർ പ്രതിഷേധിക്കുമ്പോൾ, ഉദയനിധിക്കെതിരെ ടി.വി.കെ. വനിതാ വിങ്ങും രംഗത്തെത്തിയതോടെ സംസ്ഥാനത്ത് രാഷ്ട്രീയ സംഘർഷാവസ്ഥ തുടരുകയാണ്.