ബംഗ്ലാദേശിൽ പാക് ഭീകര സംഘടന ടിടിപി വേരുറപ്പിക്കുന്നുവെന്ന് റിപ്പോർട്ട് ! വ്യാപക റിക്രൂട്ട്മെന്റ്; കണ്ണടച്ച് ബംഗ്ലാ സുരക്ഷാ-രഹസ്യവിഭാഗങ്ങള്‍ ; ഇന്ത്യയ്ക്ക് തലവേദനയാകുമെന്ന് വിദഗ്ദർ

ധാക്ക: പാക് ഭീകരസംഘടനയായ തെഹ്‌രികെ താലിബാന്‍ പാകിസ്ഥാൻ ബംഗ്ലാദേശില്‍ വേരുറപ്പിക്കുന്നതായി റിപ്പോർട്ട്. ഭീകര സംഘടനാ ബംഗ്ലാദേശിലുടനീളം റിക്രൂട്ട്‌മെന്റ് നടത്തുന്നതായും പ്രവര്‍ത്തനശൃംഖല വ്യാപിപ്പിക്കുന്നതായുമുള്ള വിവരങ്ങളാണ് പുറത്തുവന്നിരിക്കുന്നത്. ബംഗ്ലാദേശുമായി 4,000 കിലോമീറ്ററിലധികം അതിര്‍ത്തി പങ്കിടുന്ന ഇന്ത്യയ്ക്ക് ഭീകരസംഘടനയുടെ സാന്നിധ്യം തലവേദന സൃഷ്ടിക്കുമെന്നാണ് വിദഗ്ധരുടെ വിലയിരുത്തൽ.

ബംഗ്ലാദേശില്‍ നിന്ന് രണ്ടുപേരെ പാക് താലിബാന്‍ റിക്രൂട്ടു ചെയ്തിരുന്നുവെന്നതിന്റെയും അവർ പാകിസ്ഥാനിലൂടെ വഴി അഫ്ഗാനിസ്താനിലേക്ക് സഞ്ചരിച്ചതിന്റെയും വ്യക്തമായ തെളിവുകള്‍ ഇന്ത്യയ്ക്ക് ലഭിച്ചിരുന്നു. ഇതിലൊരാള്‍ പാക് സൈന്യവുമായുള്ള ഏറ്റുമുട്ടലില്‍ കൊല്ലപ്പെട്ടിരുന്നു. എന്നാൽ ബംഗ്ലാദേശിലെ സുരക്ഷാ-രഹസ്യവിഭാഗങ്ങള്‍ ഈ വിഷയം അവഗണിക്കുകയാണ്.

കഴിഞ്ഞ ഓഗസ്റ്റില്‍ ഷെയ്ഖ് ഹസീനയുടെ ഭരണകൂടം നിലംപൊത്തിയതിനുശേഷമാണ് ബംഗ്ലാദേശില്‍ ടിടിപിയുടെ പ്രവര്‍ത്തനം വര്‍ധിച്ചത്. കൂടാതെ മറ്റുചില ജിഹാദി സംഘടനകളുടെ പ്രവര്‍ത്തനം ബംഗ്ലാദേശില്‍ വര്‍ധിച്ചതായാണ് റിപ്പോര്‍ട്ട്.