കയ്യൊഴിഞ്ഞ് ബ്രിട്ടൺ ! ഷെയ്ഖ് ഹസീനയ്ക്ക് അഭയം നൽകില്ലെന്ന് റിപ്പോർട്ട് ; മറ്റ് യൂറോപ്യൻ രാജ്യങ്ങളുടെ സഹായം തേടിയേക്കും

സർക്കാർ വിരുദ്ധ പ്രക്ഷോഭത്തെത്തുടർന്ന് രാജിവച്ച ബം​ഗ്ലാദേശ് പ്രധാനമന്ത്രി ഷെയ്ഖ് ഹസീനയ്ക്ക് ബ്രിട്ടൺ അഭയം നൽകില്ലെന്ന് റിപ്പോർട്ട് . ഇന്ത്യയിൽ താത്കാലിക അഭയം തേടിയ ശേഷം ലണ്ടനിലേക്ക് തിരിക്കാനായിരുന്നു ഹസീനയുടെ പദ്ധതി. ഇതോടെ ഹസീന മറ്റ് യൂറോപ്യൻ രാജ്യങ്ങളുടെ സഹായം തേടിയേക്കുമെന്നും സൂചനയുണ്ട്. രാഷ്ട്രീയ അഭയം തേടുന്ന സ്വകാര്യ വ്യക്തികൾ ആദ്യം ചെന്നിറങ്ങുന്ന രാജ്യത്ത് അത് തേടുകയാണ് വേണ്ടതെന്ന് ബ്രിട്ടൺ നിലപാടെടുത്തതായാണ് ഉന്നതവൃത്തങ്ങളെ ഉദ്ധരിച്ച് എൻഡിടിവി റിപ്പോർട്ട് ചെയ്യുന്നത്.

അതേസമയം, ലണ്ടനിൽ രാഷ്ട്രീയ അഭയം തേടിക്കൊണ്ടുള്ള അപേക്ഷ ഹസീന ഔദ്യോ​ഗികമായി നൽകിയാതയും വിവരമുണ്ട്. സഹോദരി രെഹാനയ്ക്ക് ഒപ്പം തിങ്കളാഴ്ച വൈകുന്നേരമാണ് ഹസീന ​ഗാസിയാബാദിലെത്തിയത്. യുകെ പൗരത്വമുള്ള രെഹാനയുടെ മകൾ തുലിപ് സിദ്ദിഖ് അവിടെ ലേബർ പാർട്ടി എംപിയാണ്. ബംഗ്ലാദേശിന്റെ സൈനികവിമാനത്തിൽ ഇന്ത്യയിലെത്തിയ ഹസീനയ്ക്ക് ദേശീയ സുരക്ഷാ ഉപദേഷ്ടാവ് അജിത് ഡോവലും മുതിര്‍ന്ന സൈനിക ഉദ്യോഗസ്ഥരും നേരിട്ടെത്തി പൂര്‍ണ സുരക്ഷ വാഗ്ദാനം ചെയ്തിരുന്നു.