കോവിഡ്19 വ്യാപനം: നിയന്ത്രണം കാറ്റില്‍പറത്തി ബാങ്ക് തിരഞ്ഞെടുപ്പ്

തിരുവനന്തപുരം: സംസ്ഥാനത്ത് കോവിഡ് വ്യാപിച്ചതിനെ തുടര്‍ന്ന് പുറപ്പെടുവിച്ച നിയന്ത്രണം കാറ്റില്‍പറത്തി വാമനപുരം സര്‍വീസ് സഹകരണ ബാങ്കില്‍ തിരഞ്ഞെടുപ്പ്. ആറായിരം പേരാണ് ഭരണസമിതി തിരഞ്ഞെടുപ്പില്‍ വോട്ടുചെയ്യുന്നത്. കോവിഡിന്റെ പശ്ചാത്തലത്തില്‍ തിരഞ്ഞെടുപ്പ് മാറ്റിവയ്ക്കണമെന്ന ആവശ്യം ഉയര്‍ന്നെങ്കിലും ഇത് കണ്ടില്ലെന്നു നടിച്ചാണ് തിരഞ്ഞെടുപ്പ്.

പ്രായമായ ആളുകളെ ചുമന്നാണ് വോട്ട് ചെയ്യാനെത്തിച്ചത്. ഒരു മീറ്ററോ അതില്‍ കൂടുതലോ അകലം പാലിച്ചുകൊണ്ടേ ആളുകള്‍ നില്‍ക്കാന്‍ പാടുള്ളൂവെന്ന നിര്‍ദേശവും പാലിക്കപ്പെട്ടില്ല. എല്ലാവരും പരസ്പരം സ്പര്‍ശിച്ചാണ് വരി നിന്നത്. മാസ്‌കും ധരിച്ചില്ല. ആള്‍ക്കൂട്ടം ഒഴിവാക്കണമെന്നും ജാഗ്രതാ നിര്‍ദേശങ്ങള്‍ കര്‍ശനമായി പാലിക്കണമെന്നും ഇന്നലെ തിരുവനന്തപുരം ജില്ലാ കലക്ടര്‍ പറഞ്ഞിരുന്നു.