ആർജെഡിയും കോൺഗ്രസും നുഴഞ്ഞുകയറ്റക്കാരെ സംരക്ഷിക്കുന്നു! രാഷ്ട്രീയലാഭത്തിനുവേണ്ടി ജനങ്ങളെ നുണകൾ കൊണ്ട് തെറ്റിദ്ധരിപ്പിക്കുന്നു! ബിഹാറിൽ പ്രതിപക്ഷത്തിനെതിരെ രൂക്ഷ വിമർശനവുമായി പ്രധാനമന്ത്രി

പാറ്റ്‌ന : ആര്‍ജെഡിയെയും കോണ്‍ഗ്രസിനെയും കടന്നാക്രമിച്ച് പ്രധാനമന്ത്രി നരേന്ദ്രമോദി. ഇരുവരും നുഴഞ്ഞുകയറ്റക്കാരെ സംരക്ഷിക്കുകയാണെന്നും രാഷ്ട്രീയലാഭത്തിനുവേണ്ടി ജനങ്ങളെ നുണകള്‍ കൊണ്ട് തെറ്റിദ്ധരിപ്പിക്കുകയാണെന്നും മോദി വിമർശിച്ചു. അരരിയയില്‍ തെരഞ്ഞെടുപ്പു റാലിയെ അഭിസംബോധന ചെയ്ത് സംസാരിക്കുന്നതിനിടെയായിരുന്നു പ്രധാനമന്ത്രിയുടെ വിമർശനം. ബിഹാറിനെ ക്രമക്കേടുകളിലേക്കും അഴിമതിയിലേക്കും തള്ളിവിട്ടത് ആര്‍ജെഡി നേതൃത്വം നല്‍കിയ 1990-കളിലെ സര്‍ക്കാരുകളാണെന്നും പ്രധാനമന്ത്രി വിമർശിച്ചു.

“ഒരിക്കല്‍ നിങ്ങളുടെ മുത്തച്ഛന്മാരും മുത്തശ്ശിമാരും നല്‍കിയ വോട്ടുകള്‍ ബിഹാറിനെ സാമൂഹികനീതിയുടെ നാടാക്കി മാറ്റിയിരുന്നു. എന്നാല്‍, തൊണ്ണറുകളായപ്പോള്‍ ആര്‍ജെഡിയുടെ ജംഗിള്‍രാജ് സംസ്ഥാനത്തെ ആക്രമിച്ചു. തോക്കുകള്‍, ക്രൂരത, അഴിമതി, ദുര്‍ഭരണം ഇവ ബിഹാറിന്റെ കാലക്കേടുകളായി. നിങ്ങളുടെ മാതാപിതാക്കളുടെ സ്വപ്‌നങ്ങള്‍ ചതച്ചരയ്ക്കപ്പെട്ടു. ആര്‍ജെഡി സംസ്ഥാനം ഭരിച്ച പതിനഞ്ചുവര്‍ഷക്കാലം യാതൊരു വികസനവും ഉണ്ടായിട്ടില്ല. ഭരണമെന്ന പേരില്‍ നിങ്ങള്‍ കൊള്ളയടിക്കപ്പെടുക മാത്രമാണുണ്ടായത്. 15 കൊല്ലത്തെ ജംഗിള്‍ രാജിനിടയില്‍ ബിഹാറില്‍ എത്ര എക്‌സ്പ്രസ് വേകള്‍ നിര്‍മിക്കപ്പെട്ടിട്ടുണ്ട്-പൂജ്യം”- പ്രധാനമന്ത്രി നരേന്ദ്രമോദി പറഞ്ഞു.