റോയിട്ടേഴ്സിലെ മലയാളി മാധ്യമപ്രവർത്തകയെ മരിച്ച നിലയിൽ കണ്ടെത്തി; ദുരൂഹത ആരോപിച്ച്‌ ബന്ധുക്കള്‍

ബെംഗളൂരു: ബംഗളൂരൂവിൽ മലയാളി മാധ്യമപ്രവർത്തകയെ മരിച്ച നിലയിൽ കണ്ടെത്തി. റോയിട്ടേഴ്സിന്റെ ബംഗളൂരൂ ഓഫീസിലെ സബ് എഡിറ്ററായ ശ്രുതിയെ അപ്പാര്‍ട്ട്മെന്റിലാണ് തൂങ്ങിമരിച്ച നിലയില്‍ കണ്ടെത്തിയത്. കാസര്‍കോട് വിദ്യാനനഗര്‍ സ്വദേശിയാണ് ഇരുപത്തിയെട്ടുകാരിയായ ശ്രുതി.

ശ്രുതിയും ഭര്‍ത്താവ് അനീഷും നല്ലൂറഹള്ളിയിലുള്ള മെഫെയറിലെ അപ്പാര്‍ട്ട്‌മെന്റിലാണ് താമസിക്കുന്നത്. ശ്രുതി മരിക്കുന്ന ദിവസം ഭർത്താവ് നാട്ടിലായിരുന്നു. ശ്രുതിയുടെ അമ്മ നാട്ടില്‍ നിന്നും പലവട്ടം വിളിച്ചിട്ടും ഫോണ്‍ എടുക്കാതായതോടെ ബംഗളൂരുവില്‍ എഞ്ചിനിയറായ സഹോദരന്‍ നിശാന്തിനോട് കാര്യം പറഞ്ഞു. തുടര്‍ന്ന് നിശാന്ത് ശ്രുതിയുടെ അപ്പാര്‍ട്ടിമെന്റിലെ സെക്യൂരിറ്റിയെ ബന്ധപ്പെടുകയായിരുന്നു.

സെക്യൂരിറ്റി എത്തിയ സമയത്ത് മുറി അകത്ത് നിന്നും പൂട്ടിയ നിലയിലായിരുന്നു. തുടര്‍ന്ന് ചവിട്ടി തുറന്നപ്പോഴാണ് മരിച്ച നിലയില്‍ കണ്ടെത്തിയത്. അഞ്ചു വര്‍ഷം മുന്നെയായിരുന്നു ശ്രുതിയുടെ വിവാഹം നടന്നത്. മരണത്തില്‍ ദുരൂഹത ആരോപിച്ച്‌ ബന്ധുക്കള്‍ പൊലീസില്‍ പരാതി നല്‍കിയിട്ടുണ്ട്. പരിസ്ഥിതി പ്രവര്‍ത്തകനും അദ്ധ്യാപകനുമായിരുന്ന നാരായണന്‍ പേരിയയുടെയും അദ്ധ്യാപികയായിരുന്ന സത്യഭാമയുടെയും മകളാണ് ശ്രുതി.