ജനാധിപത്യത്തിൽ എതിർപ്പും പ്രതിഷേധവും വേണം, പക്ഷേ ഉത്തരവാദിത്വം മറക്കരുത്: സ്വാതന്ത്ര്യദിനത്തിൽ ഡോ. മോഹൻജി ഭാഗവത്

നാഗ്പൂർ: “വിയോജിക്കാം… ചോദ്യം ചെയ്യാം… പ്രതിഷേധിക്കാം… പക്ഷേ ഉത്തരവാദിത്വം മറക്കരുതെന്ന് രാഷ്ട്രീയ സ്വയം സേവക് സംഘ സർസംഘചാലക് ഡോ. മോഹൻജി ഭാഗവത്. ജനാധിപത്യത്തിന്റെ ശക്തി അഭിപ്രായവ്യത്യാസങ്ങളിലാണെന്ന് ഓർമ്മിപ്പിച്ച അദ്ദേഹം ജനാധിപത്യത്തിൽ വ്യത്യസ്ത ആശയങ്ങളും അഭിപ്രായങ്ങളും സ്വാഭാവികമാണെന്നും, പൊതുതാൽപര്യവുമായി ബന്ധപ്പെട്ട ചോദ്യങ്ങൾ ശക്തമായി ഉന്നയിക്കണമെന്നും പറഞ്ഞു. സ്വാതന്ത്ര്യദിനാഘോഷങ്ങളുടെ ഭാഗമായി നാഗ്പൂരിലെ കസ്തൂർചന്ദ് പാർക്കിൽ നടന്ന പരിപാടിയിൽ സംസാരിക്കുകയായിരുന്നു മോഹൻ ഭാഗവത്.

“വ്യത്യസ്ത ആശയങ്ങളും അവ പ്രകടിപ്പിക്കാനുള്ള വ്യത്യസ്ത മാർഗങ്ങളും ഉണ്ടാകും. ഇതാണ് ജനാധിപത്യം. അതുകൊണ്ടുതന്നെ സംവാദവും ചർച്ചയും വാദപ്രതിവാദങ്ങളും ഉണ്ടാകും. ഒരാളുടെ വാദം അവതരിപ്പിക്കുകയും മറ്റൊരാളുടെ വാദത്തിന് മറുപടി നൽകുകയും ചെയ്യുന്നത് ജനാധിപത്യത്തിന്റെ ഭാഗമാണ്,” അദ്ദേഹം പറഞ്ഞു.

വിയോജിപ്പുകളും എതിർപ്പുകളും സ്വാഭാവികമാണെന്നും, പൊതുതാൽപര്യത്തിനായി ചോദ്യങ്ങൾ ഉയരുമ്പോൾ അവ ശക്തമായി തന്നെ ഉന്നയിക്കണമെന്നും ഭാഗവത് വ്യക്തമാക്കി. അതേസമയം, പ്രതിഷേധങ്ങളും പ്രക്ഷോഭങ്ങളും ജനാധിപത്യത്തിന്റെ ഭാഗമാണെങ്കിലും അതിനൊപ്പം പൗരന്മാർ തങ്ങളുടെ ഉത്തരവാദിത്വവും മറക്കരുത് എന്നായിരുന്നു അദ്ദേഹത്തിന്റെ ഓർമ്മപ്പെടുത്തൽ. ഭരണഘടനാ നിർമാണ കാലത്ത് ഡോ. ബി.ആർ. അംബേദ്കർ നടത്തിയ പ്രസംഗങ്ങളെ പരാമർശിച്ച ഭാഗവത്, ഈ വിഷയങ്ങളിൽ അംബേദ്കർ മുന്നോട്ടുവച്ച സമീപനം രാജ്യത്തിന് പിന്തുടരാവുന്നതാണെന്നും പറഞ്ഞു.

യുവതയാണ് ഇന്ത്യയുടെ ശക്തി
ഇന്ത്യയുടെ യുവജനങ്ങളെ ശരിയായ രീതിയിൽ നയിക്കുകയും അവരുടെ കഴിവുകളെ രാജ്യനിർമാണത്തിനായി ഉപയോഗപ്പെടുത്തുകയും ചെയ്യേണ്ടതിന്റെ ആവശ്യകതയും മോഹൻ ഭാഗവത് ചൂണ്ടിക്കാട്ടി.“ഇന്ത്യയുടെ യുവത്വം രാജ്യത്തിന്റെ ഡെമോഗ്രാഫിക് ഡിവിഡന്റാണ്” എന്നായിരുന്നു അദ്ദേഹത്തിന്റെ വിലയിരുത്തൽ.

യുവാക്കളെ ശരിയായ രീതിയിൽ വളർത്തിയെടുക്കാൻ കഴിഞ്ഞാൽ അവർ രാജ്യത്തിന്റെ വലിയ സമ്പത്തായി മാറും. എന്നാൽ അവരെ ശരിയായ ദിശയിൽ നയിക്കാൻ കഴിഞ്ഞില്ലെങ്കിൽ അതേ യുവശക്തി സമൂഹത്തിന് ഭാരമായി മാറാനും സാധ്യതയുണ്ടെന്ന് അദ്ദേഹം മുന്നറിയിപ്പ് നൽകി.

ഇന്നത്തെ യുവതലമുറയാണ് ഏകദേശം 30 വർഷങ്ങൾക്ക് ശേഷം രാജ്യത്തെ മുതിർന്ന തലമുറയായി മാറുക. അതിനാൽ തങ്ങൾക്ക് പിന്നാലെ വരുന്ന തലമുറയോടും ഉത്തരവാദിത്വവും കരുതലും പുലർത്തേണ്ടത് അനിവാര്യമാണെന്നും ഭാഗവത് പറഞ്ഞു.

‘യുവ ശക്തി ഫോർ വികസിത് ഭാരത്@2047’ എന്ന വിശാലമായ ആശയത്തെ കേന്ദ്രീകരിച്ചാണ് ഇത്തവണത്തെ 80-ാം സ്വാതന്ത്ര്യദിനാഘോഷങ്ങൾ നടക്കുന്നത്. ഇന്ത്യയുടെ വികസനയാത്രയിൽ യുവത്വത്തിന്റെ പങ്ക് കൂടുതൽ ശക്തമായി മുന്നോട്ടുവയ്ക്കുന്ന സന്ദേശം കൂടിയാണ് ഇത്.

ജനാധിപത്യം എന്നത് അന്ധമായ പിന്തുണയല്ല; ചോദ്യം ചെയ്യാനുള്ള അവകാശവും വിയോജിക്കാനുള്ള സ്വാതന്ത്ര്യവും ഉത്തരവാദിത്വത്തോടെ ഉപയോഗിക്കാനുള്ള പക്വതയുമാണ്. പ്രതിഷേധിക്കാം, എതിർക്കാം, ശക്തമായി ചോദ്യം ചെയ്യാം — പക്ഷേ രാജ്യത്തോടും സമൂഹത്തോടുമുള്ള ഉത്തരവാദിത്വം മറക്കരുത് എന്ന ശക്തമായ സന്ദേശമാണ് മോഹൻ ഭാഗവതിന്റെ വാക്കുകളിൽ നിറയുന്നത്.